राजधानी दिल्लीतील पीरागढी परिसरात एका कारमध्ये तीन मृतदेह सापडल्याच्या घटनेने संपूर्ण देश हादरला होता. या 'ट्रिपल मर्डर' प्रकरणाचा तपास करत असताना दिल्ली पोलिसांनी एका अशा नराधमाला बेड्या ठोकल्या आहेत, ज्याच्या कृत्यांनी पोलिसांच्याही पायाखालची जमीन सरकली आहे. कमरुद्दीन नावाच्या एका पाखंडी बाबाने तंत्रसाधनेच्या नावाखाली आतापर्यंत तब्बल ८ लोकांची हत्या केल्याची धक्कादायक कबुली दिली आहे.
काय आहे हे संपूर्ण प्रकरण?
गेल्या ८ फेब्रुवारी रोजी पीरागढी परिसरात एका टाटा टिगोर कारमध्ये तीन जणांचे मृतदेह संशयास्पद अवस्थेत आढळले होते. तपासादरम्यान पोलिसांना सीसीटीव्ही फुटेज मिळाले, ज्यामध्ये मृत व्यक्ती लोनी परिसरात याच पांढऱ्या कारमधून येताना दिसल्या. दुसऱ्या फुटेजमध्ये ते गाडी पार्क करून कमरुद्दीनच्या घराच्या दिशेने चालत जाताना दिसले. या फुटेजमुळेच कमरुद्दीन पोलिसांच्या जाळ्यात अडकला.
मुलींची 'निवड' करण्याची विचित्र पद्धत
पोलिसांनी कमरुद्दीनच्या अड्ड्यावर धाड टाकली असता तिथे धक्कादायक पुरावे सापडले. हा पाखंडी बाबा तंत्रसाधनेच्या नावाखाली मुलींना बोलावयचा. विशेष म्हणजे, त्याला विशिष्ट उंची, वजन आणि वर्णाचीच मुलगी हवी असायची. पोलिसांना त्याच्याकडे अशा अनेक मुलींचे फोटो सापडले आहेत, ज्यांच्या हातात एक कागद असून त्यावर त्यांचे नाव, वजन आणि उंची लिहिलेली आहे. या खुनातील मृत लक्ष्मी नावाच्या महिलेच्या फोनमध्येही असेच फोटो सापडल्याने कमरुद्दीनचा कट उघड झाला आहे.
रिमांडमध्ये रोज नवे खुलासे
दिल्ली पोलिसांनी कमरुद्दीनला ५ दिवसांच्या पोलीस कोठडीत घेतले आहे. चौकशीदरम्यान त्याने मान्य केले की, त्याने केवळ या तिघांचीच नाही, तर आतापर्यंत ८ जणांचा बळी घेतला आहे. त्याच्या अड्ड्यावरून तंत्रसाधनेची पुस्तके आणि काही संशयास्पद साहित्यही जप्त करण्यात आले आहे. हा बाबा नेमका कोणत्या हेतूने या हत्या करत होता? यामागे मानवी बळी देण्याचा काही प्रकार होता का? याचा तपास आता पोलीस करत आहेत.
भोंदूगिरीचा बळी?
लोकांच्या अंधश्रद्धेचा फायदा घेऊन त्यांना मृत्यूच्या दारात ढकलणाऱ्या या बाबाच्या कृत्यामुळे लोनी आणि पीरागढी परिसरात दहशतीचे वातावरण आहे. आरोपीने पोलिसांना दिलेल्या कबुलीत अनेक लोकांच्या नावांचा उल्लेख केला असून, पोलीस आता त्या बेपत्ता व्यक्तींचा शोध घेत आहेत. दिल्ली पोलीस या संपूर्ण प्रकरणाच्या मुळाशी जाण्याचा प्रयत्न करत असून, यामागे आणखी काही लोकांचा हात आहे का, याचाही शोध घेतला जात आहे.