बिहारच्या भोजपूर जिल्ह्यात एक धक्कादायक घटना घडली आहे. सहामाही परीक्षा देत असलेल्या आपल्य़ा बहीणीला कॉपी पुरविण्यासाठी गेलेल्या १२ वर्षांच्या मुलाच्या शरीराचे रेल्वे ट्रॅकवर तुकडे तुकडे सापडले आहेत. एका छोट्याशा गैरसमजामुळे त्याला आपले प्राण गमवावे लागले आहेत.
सध्या सहामाही परीक्षा सुरु आहेत. वर्गात परीक्षा देत असलेल्या विद्यार्थिनीला खिडकीतून कॉपी देण्यासाठी तिचा भाऊ आला होता. त्याने कॉपीचा कागद तिच्या दिशेने आत फेकला. परंतू, तो तिच्याकडे न पडता दुसऱ्याच विद्यार्थिनीकडे जाऊन पडला. या मुलीला ते लव्हलेटर असल्याचे वाटले, याची तक्रार तिने घरच्यांकडे केली. तिच्या घरच्यांनी मुलाला पकडून त्याचे तुकडे तुकडे केले आणि रेल्वे ट्रॅकवर नेऊन टाकले.
सोमवारी पोलिसांनी त्याचे शरीर गोळा केले. या प्रकरणी पोलिसांनी ९ जणांना अटक केली आहे. उदवंतनगर पोलीस ठाणे परिसरातील हा प्रकार आहे. दया कुमार असे या मुलाचे नाव आहे. तो १३ ऑक्टोबरला मोठ्या बहीणीच्या शाळेत गेला होता. मुलगी सहावीत शिकत होती, तर तो पाचवीत परंतू दुसऱ्या शाळेत शिकत होता.
दुसऱ्या मुलीने तिच्या भावांना या प्रकाराची माहिती दिली. त्यानी त्याला पकडून मारहाण केली व अपहरण केले. चार दिवसांनी त्याचा मृतदेह सापडला आहे. या प्रकरणी एकूण ९ जणांना अटक करण्यात आली असून त्यापैकी ४ जण हे अल्पवयीन आहेत. उरलेल्या पाच जणांना पोलीस कोठडीत पाठविण्यात आले आहे.