लोकमत न्यूज नेटवर्क
भिवंडी - किरकोळ वादातून एका २५ वर्षीय तरुणावर भर रस्त्यातच गावगुंडांनी चॉपर आणि तलवारीने जीवघेणा हल्ला केल्याची धक्कादायक घटना शहरातील चरणी पाडा परिसरात घडली रविवारी आहे. विशेष म्हणजे हल्ल्याचा थरार मोबाईल कॅमेऱ्यात कैद झाला असून सध्याया मारहाणीचा व्हिडिओ सोशल मीडियावर व्हायरल झाला आहे. याप्रकरणी नारपोली पोलीस ठाण्यात हल्लेखोराविरोधात विविध कलमानुसार गुन्हा दाखल करून चौघांना अटक केली आहे.
गेनू बांगारे ,मनोज बांगारे, गोपी गिरी, अमित रायत असे अटक केलेल्या हल्लेखोरांची नावे आहेत. तर अमोल माने ( वय २५) असे हल्ल्यात गंभीर झालेल्या तरुणाचे नाव आहे. अंजुरफाटा चरणीपाडा भागात अमोल कुटुंबासह राहतो. रविवारी रात्रीच्या सुमारास अमोल भरधाव वेगाने आपली कार घेऊन जात असताना आरोपीचा समज झाला कि आमच्या जवळून भरधाव वेगाने कार घेऊन कसा जातो. याच गोष्टीचा राग मनात धरून या गाव गुंडानी अमोल याच्यावर भर रस्त्यात चॉपर, तलवारी व लोखंडी रॉडने अचानक जीवघेणा हल्ला केला.
अमोलवर हल्ला केल्याचे पाहून अमोलचे वडील व त्यांचे भाऊ हे त्याला वाचविण्यासाठी आले होते. मात्र त्यांनाही या गावगुंडाने जखमी केले आहे. सध्या अमोलवर भिवंडीतील एका खाजगी रुग्णालयात उपचार सुरू असून त्याची प्रकृती गंभीर असल्याचे सांगण्यात आले आहे. नारपोली पोलीस ठाण्यात सोमवारी सायंकाळी हल्लेखोरां विरोधात गुन्हा दाखल करून सोमवारी रात्री उशीरा चार हल्लेखोरांना पोलिसांनी अटक केली आहे. या हल्ल्याच्या थराराचा व्हिडिओ परिसरातील इमारतीमधून एका नागरिकांनी मोबाईल कॅमेऱ्यात कैद केला असून सध्या हा व्हिडिओ सोशल मीडियावर मोठ्या प्रमाणात व्हायरल होत आहे.