पटना – हुंड्यांच्या लालसेपोटी एका युवकाने पती-पत्नीच्या नात्याला काळीमा फासला आहे. ही घटना बिहारच्या नालंदा जिल्ह्यातील असून या घटनेने परिसरात खळबळ माजली आहे. याठिकाणी २०१९ मध्ये लग्न झालेल्या युवकाने स्वत:च्या पत्नीला संपवलं आहे. युवकाने पत्नीचा विश्वास संपादन केला आणि पत्नीनेही डोळे झाकून पतीवर विश्वास ठेवला. त्याचीच किंमत पत्नीला जीव देऊन चुकवावी लागली आहे.
युवकाने नववर्षाच्या सुरुवातीला पत्नीचा जीव घेतला आहे. जेवणातून विष देऊन युवकाने पत्नीची हत्या केली. पतीने पत्नीशी केलेल्या विश्वासघातामुळे तिची हत्या झाली. मिळालेल्या माहितीनुसार, हरनौत पोलीस ठाण्याच्या हद्दीतील बिचली बाजार परिसरात राहणाऱ्या लवनेशचं लग्न चांदणी नावाच्या मुलीशी झालं होतं. दोघांमध्ये सर्वकाही सुरळीत झालं होतं. मात्र अचानक लवनेशच्या कुटुंबाने चांदणीच्या कुटुंबावर लग्नाच्यावेळी दिलेले आश्वासन पूर्ण करण्यास सांगितले.
लवनेशदेखील कुटुंबाच्या म्हणण्याप्रमाणे पत्नी चांदणीवर हुंड्याचे पैसे आणण्यासाठी दबाव टाकत होता. चांदणीच्या घरची परिस्थिती बिकट असल्याने त्यांना पैसे देणं कठीण होतं. त्यांच्याकडे पैसे नसल्याने लवनेशच्या कुटुंबाची मागणी ते पूर्ण करु शकत नव्हते. त्यामुळे लवनेश खूप नाराज झाला. त्यानंतर पती लवनेशनं पत्नीचा काटा काढण्याचा प्लॅन बनवला.
लवनेशला कळालं की सासरची मंडळी हुंड्यातील पैसे देण्यास असक्षम आहेत तेव्हा त्याने कुटुंबासोबत मिळून प्लॅन रचला. नवीन वर्षाच्या निमित्ताने पती लवनेशनं पत्नीशी गोड बोलत तिला स्वत:च्या हाताने जेवण भरवणार असल्याचं म्हटलं. पत्नीदेखील खुश झाली. त्यानंतर दोघांनी खोलीचा दरवाजा आतमधून बंद करत जेवण करण्यासाठी पलंगावर बसले. पती लवनेशने काहीतरी बहाणा बनवत पत्नीला खोलीबाहेर पाठवलं. त्यानंतर खिशातून एक पुडी काढत ती जेवणात मिसळली. पत्नी खोलीत आल्यानंतर लवनेशनं तिला जेवण भरवलं.
पत्नी चांदणीच्या भावाने सांगितल्यानुसार, अलीकडेच लवनेशच्या कुटुंबाने हुंड्याच्या पैशासाठी चांदणीला बेदम मारलं होतं. माझी सासरी हत्या होईल असं वारंवार बहीण सांगत होती. अखेर तेच घडलं त्यांनी माझ्या बहिणीला मारलं. घटनेनंतर पोलिसांनी चांदणीचा मृतदेह खासगी रुग्णालयात पोस्टमोर्टमसाठी पाठवला. पोस्टमोर्टम रिपोर्टमध्ये विष देऊन हत्या केल्याचं समोर आलं. सध्या पोलीस या प्रकरणाचा तपास करत असून चांदणीच्या सासरच्या मंडळींना ताब्यात घेतले आहे.