मुंबई : स्वस्त कपड्यांच्या शोधात तरुणाला आडोशाला नेत मारहाण करत लुटल्याची धक्कादायक घटना खार लिंकिंग रोड येथे घडली. तरुणाने आरडा ओरडा करताच गस्तीवर असलेल्या पोलिसांनी तेथे धाव घेताच, आरोपींनी पळ काढला. खार पोलिसांनी जबरी चोरीचा गुन्हा नोंदवत अधिक तपास करत आहे.
खार परीसरातील जवाहर नगर येथे सुवो श्यामल हिरा (२२) हा तरुण मंगळवारी रात्री साडे नऊच्या सुमारास खरेदीसाठी तो लिकिंग रोड येथे आला होता. याच, दोघे जण त्याच्याकडे आले. स्वस्तामध्ये कपडे देण्याच्या बहाण्याने तेथील गल्लीमध्ये घेवून गेले. तेथे मारहाण करण्यास सुरुवात करत त्याच्याकडील ४ हजारांची रोकड काढून घेतली. त्याने, आरडा ओरडा करताच, गस्तीवर असलेल्या पोलिसांनी त्याच्या दिशेने धाव घेतली. आरोपीने पळण्याचा प्रयत्न केला. पोलिसांनी त्यांचा पाठलाग करत दोघांना अटक केली आहे.
इम्रान उमर मेनन , मो. शमिन शमशु इस्लाम कुरेशी अशी अटक करण्यात आलेल्या आरोपीचे नाव आहे. कुरेशी हा मुंब्रा येथील रहिवासी असून रिक्षाचालक आहे. रिक्षाच्या व्यवसायाआड अशाप्रकारे लूट करत असल्याचा संशय पोलिसांना आहे. याबाबत अधिक तपास सुरू आहे. तर, इम्रान हा धारावीचा रहिवासी असून अभियलेखावरील आरोपी आहे. त्याच्या विरुद्ध आंबोली पोलीस ठाण्यातही गुन्हा नोंद आहे. बुधवारी पहाटेच्या सुमारास दोघानाही अटक करण्यात आली आहे.
काळजी घ्या...
अशा ठिकाणी खरेदीला जाताना काळजी घेणे गरजेचे आहे. अशाप्रकारे कुणाच्या आमिषाला बळी पडून जावू नये असेही आवाहन पोलिसांकडून करण्यात येत आहे.