मीरारोड - मीरारोडच्या एका बारमध्ये पहाटे चारच्या सुमारास दारू पिण्यावरून झालेल्या वादात ग्राहकास बार कर्मचाऱ्यांनी बेदम मारहाण केल्या प्रकरणी काशिमीरा पोलीस ठाण्यात दाखल झाली आहे .
सिल्वर पार्क येथे राहणारा महेंद्र नरपत सिंग ( 27 ) हा मित्र गफार व सोहराज सह महामार्गावरील मीरा गाव नाक्यावर असलेला साई कृपा - एकवा या बार मध्ये मध्यरात्री नंतर 2 च्या सुमारास दारू पिण्यास गेला होता . पहाटे 4 वाजेपर्यंत ते मद्यपान करत होते. बार व्यवस्थापकाचे दारू मागण्यावरून गफार याच्याशी भांडण झाले. त्यात महेंद्र याला व्यवस्थापकासह बारच्या तिघा कर्मचाऱ्यांनी लाकडी दांडका व लाथा बुक्यांनी बेदम मारहाण केली. महेंद्रला कांदिवलीच्या शताब्दी रुग्णालयात दाखल केले असून गुन्हा दाखल करण्यात आला आहे. तर पोलिस व राज्य उत्पादन शुल्क विभागाच्या आशीर्वादाने बार पहाटेपर्यंत चालत असल्याचे उघड झाले आहे .