उल्हासनगर : उल्हासनगर मित्र मंडळ व निक्की फ्रेंड सर्कल गणेश मंडळ यांनी काढलेल्या आगमन मिरवणुकी मुळे शहरात वाहतूक कोंडी झाली. याची दखल उल्हासनगर पोलिसांनी घेऊन दोन्ही मंडळाच्या अध्यक्षावर गुन्हे दाखल झाले. उल्हासनगरात गणेशोत्सवा निमित्त सार्वजनिक गणेश मंडळाच्या आगमन मिरवणूका सुरू झाल्या आहेत.
१२ सप्टेंबर रोजी उल्हासनगरचा राजा म्हणून ओळख असलेल्या उल्हासनगर मित्र मंडळानेढोलताशेच्या गजरात वाहतगाजत आगमन मिरवणूक काढली. या मिरवणुकीमुळे शहरात काही तास वाहतूक कोंडी निर्माण झाली. विनापरवाना आगमन मिरवणूक काढल्याचा ठपका उल्हासनगर पोलिसांनी मंडळाचे अध्यक्ष महेंद्रसिंग हुद्दासिंग लबाना यांच्यावर गुन्हा दाखल केला.
दुसऱ्या घटनेत निक्की फ्रेंड सर्कल गणेश मित्र मंडळाने बुधवार १३ सप्टेंबर रोजी गणेश आगमन मिरवणूक ढोलताशेच्या गजरात काढल्याने, शहरातील सी ब्लॉक, गोलमैदान आदी परिसरात वाहतूक कोंडी केल्याचा ठपका उल्हासनगर पोलिसांनी ठेवून मंडळाचे अध्यक्ष नितीन उर्फ घनश्यामदास रहाटा यांच्यावर गुन्हा दाखल केला. याप्रकरणी अधिक तपास पोलीस करीत आहेत.