शिक्षण संचालक स्वत: वर्ग घेतात तेंव्हा़़़

बीड : राज्याच्या माध्यमिक व उच्च माध्यमिक विभागाचे संचालक सर्जेराव जाधव यांनी येथील चंपावती विद्यालयात मंगळवारी वार्षिक तपासणी केली. यावेळी त्यांनी वर्ग घेत गुरुजींची भूमिकाही निभावली. शालेय व्यवस्थापनाला सूचना करीत त्यांनी शाबासकी दिली़ सकाळी परिपाठालाच संचालक जाधव यांनी हजेरी लावली. त्यानंतर ते तडक एगा वर्गात गेले. संचालक दर्र्जाच्या अधिकाऱ्याने वर्गावर जाऊन खडू हातात घेत अध्यापन केल्याने शिक्षकांच्या भुवया उंचावल्या. यावेळी जाधव यांनी विद्यार्थ्यांशी थेट संवादही साधला. त्यांनी सर्व विभागांना भेटी देऊन आढावा घेतला. पिण्याचे पाणी तसेच खिचडीची त्यांनी स्वत: चव चाखली. यावेळी त्यांनी प्रयोगशाळेत पाणी तपासणी करावी, अशा सूचना दिल्या. सायंकाळी सहा वाजता त्यांनी शिक्षकांची बैठक घेतली़ शिक्षणाधिकारी (मा.) लता सानप, उपशिक्षणाधिकारी धनंजय शिंदे, विजय हजारे, अधीक्षक मोहन सिरसट, जयलाल राजपूत उपस्थित होते. अन् शिक्षणाधिकाऱ्यांना साक्षात्कार चंपावती शाळेत शिक्षकाला रुजू करण्यावरुन संस्था पदाधिकारी व शिक्षणाधिकारी यांच्यात वाद झाला होता. त्यानंतर सानप यांनी शाळेतील ५० हून अधिक शिक्षक व शिक्षकेत्तर कर्मचाऱ्यांचे दोन महिन्यांचे वेतन रोखून धरले होते. त्यामुळे ऐन दिवाळीत शिक्षकांना उधारी- उसणवारी करावी लागली. शिक्षकांनी जि.प. अध्यक्ष विजयसिंह पंडित यांच्याकडे धाव घेतली होती. तेंव्हा लता सानप यांनी ‘चंपावती’मध्ये शैक्षणिक वातावरण नाही... असे सांगून नाराजी व्यक्त केली होती. त्याच सानप यांनी मंगळवारी संचालकांसमोर चंपावतीच्या शालेय व्यवस्थापनावर स्तूतीसुमने उधळली. त्यामुळे अडीच महिन्यांतच सानप यांना काय साक्षात्कार झाला? असा सवाल उपस्थित होत आहे. संचालकांचा सानप यांना सवाल संचांलक जाधव यांनी संगणक विभागाला भेट दिली. तेथे चाळीस संगणक होते;परंतु एकही संगणक माध्यमिक विभागाने उपलब्ध केलेले नव्हते. सर्व संगणक संस्थेनेच खरेदी केले होते. शासकीय योजनेतून संगणक का दिले नाही? असा प्रश्न जाधव यांनी त्यांना केला. यावेळी लता सानप निरुत्तर झाल्या. (प्रतिनिधी)