वाळूज महानगर : २२ वर्षीय तरुणाला धडक देऊन त्याच्या मृत्यूस कारणीभूत ठरलेल्या फरार रिक्षा चालकाविरुद्ध एमआयडीसी वाळूज पोलीस ठाण्यात गुन्हा दाखल करण्यात आला आहे.
गणेश शंकर गायकवाड (रा. पंढरपूर) ७ नोव्हेंबरला रात्री ९ वाजता कंपनीतून सुटी झाल्यानंतर पायी घरी जात होता. पंढरपुरातील बुलेट शोरूमसमोर भरधाव रिक्षाने (एम.एच.२०, सी.यू.०१९२) त्याला पाठीमागून जोराची धडक दिली. गंभीर जखमी अवस्थेत त्याला शासकीय रुग्णालयात दाखल केले. उपचारादरम्यान रात्री ११.४५ वाजता गणेश गायकवाड याची प्राणज्योत मालवली. याप्रकरणी शंकर गायकवाड यांच्या फिर्यादीवरून फरार रिक्षा चालकाविरुद्ध एमआयडीसी वाळूज पोलीस ठाण्यात गुन्हा दाखल करण्यात आला आहे.
-----------------------
मार्शल आर्टच्या खेळाडूंना प्रमाणपत्राचे वाटप
वाळूज महानगर : सिडको वाळूज महानगर परिसरातील श्री नारायण मार्शल आर्टतर्फे प्रशिक्षण घेणाऱ्या खेळाडूंना बेल्ट व प्रमाणपत्रांचे वाटप करण्यात आले.
वोवीनाम राज्य असोसिएशनतर्फे वाळूज महानगर परिसरातील खेळाडूंना स्वरक्षणासाठी मार्शल आर्टचे प्रशिक्षण देण्यात येते. सिडको महानगरात आयोजित कार्यक्रमात संस्थेचे अध्यक्ष शंकर महाबळे यांच्या हस्ते मार्शल आर्टचे यशस्वी प्रशिक्षण घेणाऱ्या ५३ खेळाडूंना बेल्ट व प्रमाणपत्रांचे वाटप करण्यात आले. या खेळाडूंना प्रशिक्षक भाग्यश्री महाबळे, नेहा चौघुले यांचे मार्गदर्शन लाभले.
----------------------------
सुनील राठी यांची निवड
वाळूज महानगर : सुनील राठी यांची भाजप युवा मोर्चाच्या ग्रामीण जिल्हा उपाध्यक्षपदी नुकतीच निवड करण्यात आली. युवा मोर्चाचे जिल्हाध्यक्ष सूरज लोळगे यांनी त्यांना निवडीचे पत्र दिले.
---------------------------
एफडीसी चौकात अतिक्रमण
वाळूज महानगर : वाळूज उद्योगनगरीतील एफडीसी चौकात विविध विक्रेत्यांनी अतिक्रमणे करून व्यवसाय थाटले आहेत. या अतिक्रमणांमुळे या चौकात सतत वाहतुकीची कोंडी होत आहे. विक्रेत्यांनी रस्त्याच्या कडेला हॉटेल, हातगाड्या व पानटपऱ्या टाकून व्यवसाय सुरू केले. ग्राहकही रस्त्यावर वाहने उभी करीत असल्यामुळे रहदारीला अडथळा निर्माण होत आहे. अतिक्रमणे हटविण्याची मागणी सुशील सूर्यवंशी, राजेभाऊ शिंदे, आदित्य मुळे आदींनी केली आहे.
-------------------------------
वाळूजला पथदिवे बंदच
वाळूज महानगर : वाळूज ते कमळापूर रस्त्यावरील पथदिवे बंद असल्यामुळे नागरिक व वाहनधारकांना अंधारातून ये-जा करावी लागत आहे. ग्रामपंचायतीने लावलेले अनेक पथदिवे व क्लस्टरमधून उभारण्यात आलेले हायमास्टही बंदच असल्यामुळे सर्वत्र अंधार असतो. या पथदिव्यांची दुरुस्ती करण्याची मागणी नागरिकांतून होत आहे.
-------------------------