औरंगाबाद : भिंतीवर रजई टाकल्याच्या कारणावरून शेजारी राहणाऱ्या दोन कुटुंबात तुंबळ हाणामारी झाल्याची घटना ११ सप्टेंबर रोजी सकाळी साडेअकरा वाजेच्या सुमारास जुना बायजीपुरा येथे घडली. या घटनेत दोन्ही गटांचे सुमारे पाच जण जखमी झाले असून जिन्सी पोलीस ठाण्यात परस्परविरोधी गुन्हे नोंदविण्यात आले.
अदनान खान युसूफ खान आणि शहारूख खान शकील खान हे आपसांत नातेवाईक असून जुना बायजीपुरा येथे त्यांचे कुटुंब शेजारी राहतात. ११ सप्टेंबर रोजी सकाळी साडेअकरा वाजेच्या सुमारास अदनान यांचा लहान भाऊ अयास आणि आई शेजारी बंद असलेल्या घराच्या भिंतीवर रजई वाळू घालत होती. यावेळी आरोपी शकील खान रऊफ खान, शकीला बेगम, तोहरा, शहारूख आणि एका महिलेने त्यांना शिवीगाळ करून रजई वाळू घालण्यास मनाई करत मारहाण केली. अदनान खान, त्यांची आई आणि वडील हे त्यांना समजावून सांगत असताना आरोपींनी त्यांनाही धारदार वस्तूने मारहाण करून जखमी केल्याची तक्रार अदनानने नोंदविली.
दुसरीकडे, शहारूख यांच्या तक्रारीनुसार त्यांच्या आईवडिलांना शेजारी राहणारे आरोपी युसूूफ खान रऊफ खान, अदनान युसूफ खान आणि त्याची आई मारहाण करीत असल्याचे पाहून भांडण सोडविण्यासाठी ते गेले असता त्यांनाही आरोपींनी मारहाण करून जीवे मारण्याची धमकी दिली. अदनानने फरशीच्या तुकड्याने डोक्यावर मारून गंभीर जखमी केले. या घटनेचा तपास सहायक उपनिरीक्षक रोकडे करीत आहेत.