तरुणाकडून लाच घेताना दोन पोलीस हवालदारांना पकडले

औरंगाबाद : तरुणास चोरीचा गुन्हा दाखल करण्याची धमकी देऊन त्याच्याकडून ५ हजार रुपयांची लाच घेणार्‍या दोन पोलीस हवालदारांना लाचलुचपत प्रतिबंधक खात्याच्या पोलिसांनी सापळा रचून बुधवारी रंगेहाथ पकडले. याप्रकरणी बेगमपुरा पोलीस ठाण्यात गुन्हा दाखल करण्यात आला. प्रकाश नामदेव दांडगे (४८, रा. पोलीस कॉलनी) आणि अ‍ॅन्थोनी लुईस फ्रान्सिस (३४, रा. न्यू नंदनवन कॉलनी) अशी अटक करण्यात आलेल्या पोलिसांची नावे आहेत. प्राप्त माहिती अशी की, फिर्यादी शेख अमीर आणि मोहसीन पठाण हे मित्र आहेत. मोहसीनला पैशाची गरज असल्याने त्याने त्याची मोटारसायकल विक्रीसाठी काढली होती. मात्र, मोटारसायकलला ग्राहक मिळत नव्हते. दरम्यान, त्याने अमीरकडून काही रक्कम हातउसनी घेतली आणि त्याची मोटारसायकल वापरण्यास दिली. चार दिवसांनंतर पैसे परत न केल्यास मोटारसायकल तुझ्या मालकीची होईल, असे अमीरला सांगितले. त्यांनी या व्यवहारासंबंधी लेखी करार केला होता. दरम्यान, वेळेत रक्कम परत न करू शकल्याने अमीर मोटारसायकल वापरत होता. मात्र, गाडीच्या मालकीहक्काचे पेपर मोहसीनच्या नावे होते. त्याने त्याच्या ओळखीचा पोलीस हवालदार अ‍ॅन्थोनी लुईस यांची भेट घेऊन अमीरकडून मोटारसायकल परत मिळवून देण्याची विनंती केली. अ‍ॅन्थोनी यांनी ही बाब पोहेकॉ. प्रकाश दांडगे यांना सांगितली. त्यांनी मोहसीनकडून अमीर विरोधात एक अर्ज घेतला. या अर्जाची मात्र, पोलीस ठाण्याच्या स्टेशन डायरीत नोंद केली नाही. परस्पर त्यांनी अमीरला बोलावून घेतले आणि मोटारसायकल चोरीचा गुन्हा तुझ्यावर दाखल होऊ शकतो, अशी धमकी त्यांनी दिली. गुन्हा दाखल न करण्यासाठी दहा हजार रुपयांची लाच त्यांनी मागितली. एवढी रक्कम देणे अशक्य असल्याचे अमीरने सांगितल्याने शेवटी त्यांच्यात पाच हजार रुपयांची तडजोड झाली. अमीर यांनी दोन्ही हवालदारांविरोधात लाचलुचपत प्रतिबंधक खात्याकडे तक्रार नोंदविली. पोलिसांनी बेगमपुरा पोलीस ठाण्याच्या कॉर्नरवर सापळा रचला. त्यावेळी आरोपी पोलिसांच्या वतीने एका खाजगी व्यक्तीने अमीरकडून पाच हजार रुपये लाच घेतली. त्यानंतर आरोपी पोलिसांना अटक करण्यात आली. ही कामगिरी अप्पर अधीक्षक बी. बी. पिंगट यांच्या मार्गदर्शनाखाली उपअधीक्षक सुरेश वानखेडे, प्रताप शिकारे, प्रवीण मोरे, पोलीस निरीक्षक ए. व्ही. रायकर, कर्मचारी कैलास कामठे, प्रमोद पाटील, हरिभाऊ कुºहे, श्रीराम नांदुरे, अजय आवले, सुनील फेपाळे, नितीश घोडके, चालक शेख मतीन यांनी केली.