वाळूज महानगर : भरधाव ट्रक अचानक वळण घेवून दुचाकीला जोराची धडक दिल्याने झालेल्या अपघातात दुचाकीस्वार ठार झाला, तर अन्य एकजण गंभीर जखमी झाली. ही घटना शुक्रवारी रात्री औरंगाबाद-नगर महामार्गावर वाळूजजवळील साई पेट्रोलपंपासमोर घडली. विनोद गणेश बताडे (२४, रा. पदमपुरा, औरंगाबाद) असे मृताचे नाव आहे.
विनोद गणेश बताडे (२४) व मनोज उर्फ मुकेश मनोहर बरंडवाल (२२, रा. सदर) हे शुक्रवारी सायंकाळी दुचाकीवरुन (एमएच-२०, ईझेड- ३३४२) पैसे घेण्यासाठी वाळूज येथे गेले होते. काम आटोपल्यानंतर ते दुचाकीने घरी जात होते. यावेळी विनोद बताडे हा दुचाकी चालवत होता. तर मनोज हा पाठीमागे बसला होता. वाळूज लगत असलेल्या साई पेट्रोलपंपाजवळ रात्री १० वाजेच्या दरम्यान पाठीमागून भरधाव ट्रकने (एमएच-२१-एक्स २३७३) अचानक पेट्रोलपंपाकडे वळण घेतले.
दरम्यान, ट्रकच्या पाठीमागील भागाची दुचाकीला जोराची धडक बसली. यात विनोद जागेवरच बेशुद्ध पडला. तर मनोज गंभीर जखमी झाला. घटनेनंतर ट्रकचालक पसार झाला. शासकीय रुग्णालयात उपचार सुरु असताना रात्री साडेअकरा वाजेता विनोदचा मृत्यू झाला. तर मनोजवर खाजगी रुग्णालया उपचार सुरु आहेत.
या प्रकरणी वाळूज एमआयडीसी पोलीस ठाण्यात आयसर चालका विरुद्ध गुन्हा दाखल करण्यात आला आहे. पुढील तपास फौजदार लक्ष्मण उंबरे हे करित आहेत.