स्पंदननगरात चोरांचा धुमाकूळ; भरदिवसा पाच फ्लॅट फोडले

औरंगाबाद : सिडको एन-४ परिसरातील स्पंदननगर येथील दोन वेगवेगळ्या अपार्टमेंटमधील पाच फ्लॅट फोडून चोरट्यांनी लाखो रुपयांचा ऐवज चोरून नेला. ही घटना सोमवारी दुपारी ३ ते ५ वाजेदरम्यान घडली. याप्रकरणी मुकुंदवाडी पोलीस ठाण्यात रात्री उशिरापर्यंत गुन्हा दाखल करण्याची कारवाई सुरू होती.मुकुुंदवाडी पोलीस ठाण्याच्या हद्दीत चोऱ्या, घरफोड्यांचे सत्र दिवाळीतही सुरूच आहे. सिडको एन-४ मधील स्पंदननगर येथील आसावरी अपार्टमेंटमधील एल-९ फ्लॅटमध्ये राहणारे प्रशांत पाडुंरग पिसे हे एका खाजगी कंपनीत नोकरी करतात. तर त्यांची पत्नी एका अभियांत्रिकी महाविद्यालयात प्राध्यापिका आहे. दोघेही पती-पत्नी नोकरीनिमित्त घराबाहेर असल्याने त्यांच्या घराला कुलूप होते.चोरट्यांनी दाराचा कडीकोंडा तोडून घरात प्रवेश केला. घरातील लोखंडी कपाट तोडून चोरट्यांनी साडेतीन तोळ्याचे मंगळसूत्र, तीन तोळ्याच्या सोन्याच्या बांगड्या, कानातील कर्णफुले अंदाजे १२ ग्रॅम, तीन ग्रॅमची ठुसी, ४ ग्रॅमची सोन्याची अंगठी आणि रोख सहा हजार रुपये चोरून नेले. त्यांच्याच अपार्टमेंटमधील रहिवासी विपुल तनसुखलाल वडेरा यांचा फ्लॅट क्र मांक एल-५ ला चोरट्यांनी लक्ष्य केले. त्यांच्या दाराचा कोंडा तोडून चोरट्यांनी घरात प्रवेश केला. या घटनेत चोरट्यांना मात्र वडेरा यांच्या घरातील बेडरूमचा दरवाजा उघडता आला नाही. त्यामुळे चोरट्यांच्या हाती फारसे काहीच लागले नाही. याच अपार्टमेंटमध्ये चार महिन्यांपूर्वी भाड्याने राहण्यास आलेल्या एका दाम्पत्याचे बंद घर चोरट्यांनी फोडले. या घटनेत त्यांच्या घरातून रोख अडीच हजार रुपये आणि इतर किमती वस्तू चोरट्यांनी पळविल्या.तर वसंत अपार्टमेंटमधील रहिवासी प्राध्यापक अनिल सोनवणे यांचे कुटुंब दिवाळीच्या दुसऱ्या दिवशी बीड जिल्ह्यातील फु लसावंगी येथे गेले होते. त्यांच्या बंद घराचे कुलूप तोडून चोरट्यांनी लक्ष्मीपूजनासाठी वापरलेल्या कोऱ्या नोटांचे दोन हजार रुपये आणि ऐवज लांबविला.माधुरी रुस्तुम महाले ही गृहिणी आपल्या परिवारासह तापडिया फेममध्ये प्रेम रतन धन पायो हा सिनेमा पाहण्यासाठी दुपारी ३ वाजता गेल्या. त्यामुळे त्यांच्या घराला कुलूप होते. त्यांच्या घराचे कुलूप तोडून चोरट्यांनी दीड तोळ्याचा नेकलेस, दोन तोळ्याचे कानातील जोड, पाच ग्रॅमची अंगठी आणि १३ हजार रुपये रोख, असा ऐवज चोरून नेला. दोन वेगवेगळ्या अपार्टमेंटमधील बंद असलेली पाच वेगवेगळी घरे फोडल्याने रहिवासी घाबरले आहेत. चोरट्यांनी स्पंदननगरात भरदिवसा पाच घरे फोडल्याची माहिती पोलिसांना मिळताच पोलीस उपायुक्त राहुल श्रीरामे, पोलीस निरीक्षक नाथा जाधव, फौजदार नईम पठाण आणि अन्य कर्मचाऱ्यांनी घटनास्थळी धाव घेऊन पाहणी केली. उपायुक्त श्रीरामे यांनी अधिकाऱ्यांना सूचना दिल्या.