‘पदवीधर’साठी अडीच हजार मतदार

अतुल शहाणे, पूर्णा लोकसभा निवडणुकीची आचारसंहिता संपताच मराठवाडा पदवीधर मतदारसंघाची निवडणूक आचारसंहिता लागू झाली़ २० जून रोजी होणार्‍या या मतदान प्रक्रियेत तालुक्यातील २ हजार ४७१ पदवीधर मतदार मतदानाचा हक्क बजावणार आहेत़ मराठवाडा पदवीधर मतदार संघाच्या निवडणूक प्रक्रियेस २७ मेपासून सुरुवात होणार आहे़ तालुक्यात या निवडणुकीसाठी ताडकळस, चुडावा, कात्नेश्वर व पूर्णा हे चार केंद्र असणार आहेत़ ताडकळस येथील केंद्रावर २४४ पदवीधर मतदार आहेत़ त्यात २२६ पुरुष आणि १८ महिलांचा समावेश आहे़ चुडावा येथील ३६४ मतदारांमध्ये ३४१ पुरुष व २३ महिला, कात्नेश्वर येथील २२० मतदारांत २११ पुरुष व ९ महिला तर पूर्णा येथे १ हजार ६४३ मतदारांमध्ये १ हजार ४२८ पुरुष आणि २१५ महिला पदवीधर मतदारांचा समावेश आहे़ गतवर्षीपेक्षा यावर्षी पदवीधर मतदारांमध्ये लक्षणीय वाढ झाली़ मागील मतदार यादीत पूर्णा शहरात १ हजार २४० मतदार होते़ यावेळी ४४४ नवीन मतदारांची नोंदणी झाली़ तसेच यातून ४१ मतदारांची नावे वगळली आहेत़ ताडकळस मतदान केंद्रांतर्गत पूर्वी १५० मतदार होते़ वाढीव मतदारांमध्ये ९५ मतदार वाढले तर १ मतदार वगळण्यात आला़ चुडावा मतदार यादीत २२९ मतदार होते़ त्यात १४० मतदारांची वाढ झाली तर ५ मतदार वगळण्यात आले़ कात्नेश्वर केंद्रांतर्गत ११८ मतदार होते़ वाढीव मतदारांमध्ये १०४ मतदारांनी नोंदणी केली तर २ मतदार या केंद्रातून वगळले आहेत़ लोकसभा निवडणुकीनंतर लगेच लागलेल्या पदवीधर मतदारसंघाच्या आचारसंहितेमुळे राज्यभरातील शिक्षकांच्या बदली प्रक्रिया लांबणीवर पडण्याची शक्यता वर्तविली जात आहे़ पदवीधर मतदारसंघासाठी ३ जूनपर्यंत उमेदवारी अर्ज दाखल करण्यात येणार असून, ४ जून रोजी अर्जांची छाननी होणार आहे़ या मतदारसंघासाठी अद्याप कोणत्याही उमेदवाराची नावे चर्चेत नसली तरी सर्व राजकीय पक्षाचे कार्यकर्ते, पदाधिकारी तयारीला लागले आहेत़