उमरीचे तहसीलदार चतुर्भुज

उमरी : शेतीच्या फेरफारप्रकरणी तारीख वाढवून देण्यासाठी व फेरफार न करण्यासाठी पाच हजार रुपयांची लाच स्वीकारणार्‍या तहसीलदारासह अन्य दोघांना रंगेहाथ पकडून त्यांना अटक करण्यात आली़ मौजे शेलगाव येथे गट क्ऱ१७६ मध्ये ८२ आर व गट क्ऱ१७७ मध्ये ७९ आर. शेतजमीन आहे़ या शेतीच्या फेरफारप्रकरणी म्हणणे सादर करण्यासाठी तक्रारदारास उमरी तहसील कार्यालयाकडून समन्स प्राप्त झाले़ या समन्समध्ये पुढील तारीख वाढवून मिळण्यासाठी व फेरफार न करण्यासाठी उमरीचे तहसीलदार उदयकुमार शहाणे पाच हजार रुपयांची लाच मागत असल्याची तक्रार फिर्यादीने लाचलुचपत खात्याशी संपर्क साधून दिली़ २३ मे रोजी उर्ध्व पैनगंगा प्रकल्प वसाहत उमरी येथील निवासस्थानी तहसीलदार शहाणे यांना पाच हजार रुपये स्वीकारताना पकडण्यात आले़ त्यांना याकामी मदत करणारे अंशकालीन लिपिक शंकर मुंडलिक व दिलीप येमेवार यांच्याविरूद्धही गुन्हा नोंदविण्यात आला़ पोलिस अधीक्षक एऩ व्ही़ देशमुख यांच्या मार्गदर्शनाखाली पोलिस उपअधीक्षक एम़ जी़ पठाण, पोलिस निरीक्षक जी़ एस़ राहिरे, पोलिस हवालदार अशोक देशमुख, चंद्रकांत कदम, पोलिस नाईक व्यंकट शिंदे, विठ्ठल खोमणे, मारोती केसगीर, पोलिस शिपाई सतीश गुरुतवाड, चालक महंमद पठाण यांनी ही कारवाई केली़ पोलिस उपअधीक्षक एम़ जी़ पठाण तपास करीत आहेत़ (वार्ताहर)