नृसिंह जन्मोत्सव सोहळ्याची सांगता

 पोखर्णी : श्रीक्षेत्र नृसिंह पोखर्णी येथे नृसिंह जन्मोत्सव सोहळ्याची मोठ्या उत्साहात सांगता झाली. काल्याचे कीर्तन व कुस्त्यांचे जंगी सामने चांगलेच रंगले. १४ मे रोजी रात्री निघालेली श्रींच्या पालखी मिरवणुकीत हनुमान मंदिराजवळ ह.भ.प. रामकिशन महाराज ठाकुरबुवा दैठणकर व काका महाराज तेरकर यांचे कीर्तन झाले. यानंतर पालखी चावडीसमोरील प्रांगणात आल्यानंतर गवळणी, भारुडे आदींनी पालखी सोहळ्यात रंगत वाढविली. श्रींच्या पालखी सोहळ्यात भाविकांनी मोठी गर्दी केली होती. टाळ-मृदंगाचा गजर, ढोलताशे व नरहरी नामच्या गजरात पालखी मिरवणूक निघाली. पहाटे श्रींची पालखी नृसिंह मंदिरात परत आल्यानंतर सकाळी ६ वाजता ह.भ.प. वेदांतचार्य प्रल्हादशास्त्री दैठणकर यांचे काल्याचे कीर्तन झाले. कीर्तनात शास्त्रींनी धार्मिक कार्यक्रमात होणार्‍या काल्याचे महत्त्व विषद केले. सायंकाळी ६ वाजता कुस्त्यांच्या दंगली सुरू झाल्या. जिल्ह्यासह बाहेरील मल्ल कुस्त्यांसाठी पोखर्णीत दाखल झाले होते. महिलांच्या कुस्त्याही झाल्या. रात्री उशिरापर्यंत कुस्त्या सुरुच होत्या. ग्रामस्थ संयोजनामध्ये हिरिरीने सहभागी झाले होते. छोट्या-मोठ्या कुस्त्यांसह हजारो रुपयांपर्यंत पारितोषिके देण्यात आली. नृृसिंह जन्मोत्सव सोहळ्यासाठी नृसिंह संस्थान व सर्व ग्रामस्थांनी परिश्रम घेतले. (वार्ताहर)