वाळूज महानगर: भरधाव टेम्पोने दुचाकीला जोराची धडक दिल्याने झालेल्या अपघातात दुचाकीवरील दोन कामगार गंभीर जखमी झाल्याची घटना मंगळवारी दुपारी वाळूज एमआयडीसीत घडली.
शरद विठ्ठल देवकर (३५, रा. जयभवानी नगर औरंगाबाद) व मनिष सुरेश दुबे (३२, रा. रांजणगाव) हे मंगळवारी दुपारी दोन वाजेच्या सुमारास दुचाकीवरुन (एमएच- २०, एक्यु- ८५६४) वाळूज एमआयडीसीतील सिएट रोडने दत्तनगर फाटा रांजणगावकडे येते होते. ऋचा इंजिनिअरिंग कंपनीजवळून वळण घेवून येत असताना दत्तनगर फाट्याच्या दिशेने जाणाऱ्या भरधाव टेम्पोने (एमएच- ०४, ईबी- ९४५८) दुचाकीला जोराची धडक दिली. यात दोघे गंभीर जमखी झाले.
देवकर व दुबे यांना शासकीय रुग्णालयात दाखल केले. टेम्पोसह चालकाला ताब्यात घेवून वाळूज एमआयडीसी पोलिसांच्या स्वाधिन करण्यात आले. या प्रकरणी वाळूज एमआयडीसी पोलीस ठाण्यात उशिरापर्यंत गुन्हा दाखल करण्याची प्रक्रिया सुरु होती.