शनिवारी पहाटे कावसान येथील राजू निवारे, अश्विनी निवारे या दाम्पत्यावर व त्यांची मुले सायली व सोहम यांच्यावर गाढ झोपेत असताना अज्ञात मारेकऱ्यांनी तीक्ष्ण हत्याराने वार केले होते.
या हल्ल्याने राजू निवारे, अश्विनी निवारे व त्यांची दहा वर्षांची मुलगी सायली जागीच ठार झाले, तर सहा वर्षांचा सोहम गंभीर जखमी झाला होता. त्याला तातडीने औरंगाबाद येथील खासगी रुग्णालयात उपचारासाठी दाखल केले होते. सोहमच्या मानेवर, हातावर, तसेच डोक्यावर निर्दयीपणे वार केल्याने त्याची प्रकृती चिंताजनक होती; परंतु सुदैवाने त्याच्या जिवाचा धोका टळला आहे.
आरोपींच्या शोधासाठी स्थानिक गुन्हे अन्वेषण शाखेचे व पैठण पोलिसांची तीन पथके रवाना झाली असून, लवकरच आरोपींना गजाआड करण्यात येईल, असे पैठण पोलिसांनी सांगितले. तिहेरी हत्याकांडानंतर कावसान गावात स्मशानशांतता पसरली होती.