आयकर विभागातर्फे मालमत्तेचे लिलाव

औरंगाबाद : मागील ५ ते ६ वर्षांपासून आयकराची थकबाकी न भरणाऱ्या जालन्यातील एका व्यापाऱ्याचे दुकान व गोदामाचा लिलाव मंगळवारी आयकर विभागाने केला. या लिलावाची बोली ४१ लाखांपर्यंत जाऊन पोहोचली, अशा प्रकारे आयकर विभागाद्वारे थकबाकीदारांच्या संपत्तीचा लिलाव करण्याची ही पहिलीच वेळ ठरली आहे. विभागाने सर्वप्रथम मागील ५ ते ६ वर्षांत ज्यांनी आयकर भरला नाही ज्यांकडे मोठ्या प्रमाणात थकबाकी आहे अशांची यादी तयार केली. त्यांना नोटिसा पाठविल्या व नोटिसांना ज्यांनी उत्तर दिले नाही त्यांच्यावर थेट कारवाई करण्यासाठी योजना आखली. या अंतर्गत मंगळवारी जालना येथील प्रकाश कटारिया या व्यापाऱ्याची संपत्ती लिलाव करण्यात आली. या व्यापाऱ्याकडे सुमारे ९ कोटी रुपयांची आयकर थकबाकी आहे. मार्च २०१७ मध्ये कटारिया यांची स्थावर मालमत्ता आयकर विभागाने जप्त केली होती. यात दुकान व गोदामाचा समावेश होता. आज या मालमत्तेचा लिलाव करण्यात आला. लिलावाची कारवाई प्रधान आयकर आयुक्त शिवदयाल श्रीवास्तव व अप्पर आयुक्त संदीपकुमार सोळुंखे यांच्या मार्गदर्शनाखाली झाली. लिलावाची प्रक्रिया करवसुली अधिकारी अनिमेष नाशकर आणि उपायुक्त रवींद्र चव्हाण यांनी पार पाडली. (प्रतिनिधी)