उड्डाणपुलाच्या कामाची तयारी

औरंगाबाद : राज्य रस्ते विकास महामंडळाच्या वतीने जालना रोडवरील मोंढानाका चौकात उभारण्यात येणार्‍या उड्डाणपुलाचे प्रत्यक्ष काम सुरू करण्यास गती येत आहे. या ठिकाणी उड्डाणपुलाच्या पायाभरणीचे काम सुरू करण्याची तयारी सुरू झाली आहे. महामंडळाच्या वतीने मोंढानाका, सिडको बसस्थानक चौकात उड्डाणपूल उभारण्यात येत आहेत. या दोन्ही ठिकाणी प्रारंभी खडक तपासणीचे काम करण्यात आले आहे. त्यानंतर उड्डाणपुलाचे काम सुरू असताना मोंढानाका चौकातील वाहतूक सुरळीत राहण्यासाठी या मार्गावर दोन्ही बाजूंनी पर्यायी रस्त्यांचे कामही करण्यात आले. सिडको चौकातही उड्डाणपूल उभारण्याचे प्रत्यक्ष काम सुरू करण्यापूर्वी पर्यायी रस्ता तयार करण्याचे काम हाती घेण्यात आले आहे. मोंढानाका येथे गुरुवारी उड्डाणपुलाच्या पायाभरणीचे काम सुरू करण्यासाठी रस्त्याच्या दोन्ही बाजूंनी बॅरिकेड्स उभारण्यात आले. या दोन्ही चौकांत उड्डाणपूल उभारणीचे काम करताना पथदिव्यांचे खांब, भूमिगत जलवाहिन्या हटविणे आवश्यक राहणार आहे. त्यामुळे या मुद्यावर सध्या एमएसआरडीसी प्रशासन महापालिका, जीटीएल व अन्य संबंधित विभागांमध्ये चर्चा सुरू आहे. विजेचे खांब हटविताना अडचणी येणार नाहीत. मात्र, उड्डाणपुलाच्या मार्गात कोणत्या ठिकाणी जलवाहिनी आहे, याबाबत माहिती मिळण्यास अडचण येण्याची शक्यता आहे. त्यामुळे प्रत्यक्ष कामादरम्यान नेमक्या कोणत्या ठिकाणी जलवाहिनी आहे, हे समोर येईल, अशी शक्यता वर्तविण्यात येत आहे. लवकरच काम सुरू मोंढानाका येथील उड्डाणपुलाच्या पायाभरणीचे काम लवकरच सुरू होणार आहे. त्यासाठी तयारी सुरू आहे, अशी माहिती ‘एमएसआरडीसी’च्या अधिकार्‍यांनी दिली. हे आहेत कंत्राटदार मोंढानाका येथील उड्डाणपूल उभारणीचे कंत्राट मनोजा स्थापत्य, तर सिडको बसस्थानक चौकातील उड्डाणपूल उभारणीचे कंत्राट जे.एम.सी. प्रोजेक्टस् (इं) लि. यांना मिळाले आहे.