पैठण : जायकवाडी धरणाच्या स्थानिक पाणलोटक्षेत्रात होत असलेल्या धुवाधार पावसाने नाथसागरात १७९३७ क्युसेस अशी आवक सुरू असताना बुधवारी दुपारनंतर नाशिक जिल्ह्यातील धरणसमुहातून गोदावरीत विसर्ग करण्यात आल्याने जायकवाडी धरणात येणारी आवक मोठ्या प्रमाणावर वाढणार असल्याचे धरण नियंत्रण कक्षातून सांगण्यात आले. दरम्यान बुधवारी रात्री धरणाचा जलसाठा @ ७५ % झाला होता. धरणात येणारा येवा लक्षात घेता धरण पूर्ण क्षमतेने भरेल असा अंदाज वर्तविण्यात येत आहे.
जायकवाडी धरणाच्या पाणलोटक्षेत्रात येणाऱ्या औरंगाबाद, व अहमदनगर जिल्ह्यातील शेवगाव, नेवासा या तालुक्यात धुवाधार पाऊस सुरू असल्याने मंगळवारी दुपारनंतर जायकवाडी धरणात येणारी आवक वाढत गेली. दरम्यान, बुधवारी सकाळी १७९३७ क्युसेस अशा मोठ्या क्षमतेने नाथसागरात पाणी दाखल होत होते. नाशिक जिल्ह्यातून पुन्हा मोठा विसर्ग.. दरम्यान बुधवारी नाशिक जिल्ह्याला जोरदार पावसाने झोडपून काढल्याने तेथील धरण समुहापैकी दारणा २७०८ क्युसेस, गंगापूर ८१२९ क्युसेस, गौतमी ७५० क्युसेस, व कडवा धरणातून ४२४ क्युसेस असा विसर्ग दुपारी करण्यात आला.
सायंकाळी ५ वा नांदूरमधमेश्वर धरणातून मात्र १४२३४ असा मोठा विसर्ग गोदावरी पात्रात करण्यात आला. यात आणखी वाढ होण्याची शक्यता असल्याचे नाशिक पाटबंधारे विभागाने कळविले आहे. यामुळे जायकवाडी धरणात मोठी आवक होऊन जलसाठ्यात वाढ होणार असल्याचे धरण अभियंता विजय काकडे यांनी सांगितले. दरम्यान अहमदनगर जिल्ह्यातील मुळा धरणातून बुधवारी दुपारी ३ च्या दरम्यान १०८५ क्युसेस विसर्ग करण्यात आला असून हे पाणी जायकवाडी कडे झेपावले आहे. १५२२ फूट क्षमता असलेले जायकवाडी धरणाची पाणीपातळी बुधवारी १५१७ फूट झाली होती. धरणात एकूण जलसाठा २३५७.४९४ दलघमी ( ८३ टिएमसी ) तर उपयुक्त जलसाठा १६१९.४९४ दलघमी ( ५७ टीएमसी) एवढा झाला आहे. येणारी आवक लक्षात घेता धरण पूर्ण क्षमतेने भरण्याची शक्यता वर्तविली जात आहे.