लोकमत न्यूज नेटवर्कपरभणी : महा ई-सेवा केंद्रांना विविध प्रमाणपत्रे देण्यासंदर्भात शासनाने दर ठरवून दिले आहेत. जर काही महा ई-सेवा केंद्र चालक अधिकचे पैसे घेऊन विद्यार्थ्यांची लूट करीत असतील तर त्यांची चौकशी करुन कारवाई केली जाईल, अशी माहिती येथील तहसीलदार विद्याचरण कडवकर यांनी दिली.परभणी येथील काही महा ई-सेवा केंद्र चालकांकडून विविध प्रमाणपत्रे काढण्यासाठी विद्यार्थ्यांकडून जास्तीचे पैसे आकारले जात असल्याचा प्रकार ‘लोकमत’च्या वतीने गुरुवारी करण्यात आलेल्या स्टिंग आॅपरेशनमध्ये उघडकीस आला होता. या संदर्भातील वृत्त शुक्रवारी प्रसिद्ध झाल्यानंतर महा ई-सेवा केंद्र चालकांमध्ये खळबळ उडाली. याबाबत तहसीलदार विद्याचरण कडवकर म्हणाले की, शासनाने महा ई-सेवा केंद्र चालकांना प्रमाणपत्रे देण्यासंदर्भात दर ठरवून दिले आहेत. अधिकचे पैसे घेणाऱ्या महा ई-सेवा केंद्रांची चौकशी करण्यात येईल. यामध्ये दोषी आढळणाऱ्यांवर कारवाई केली जाईल. जनतेनेही शासकीय दरापेक्षा अधिकचे पैसे देऊ नयेत, काही तक्रार असल्यास तहसील कार्यालयाशी संपर्क साधावा.
महा ई-सेवा केंद्रांची चौकशी करणार
By admin | Updated: June 23, 2017 23:35 IST