जुन्याच मार्गावर धावतात मानव विकासच्या बसेस

हिंगोली : नवशैक्षणिक वर्षाची सुरूवात झाली असताना मानव विकास मिशनच्या बसेस मात्र जुन्याच मार्गाने धावतात. गतवर्षी शैक्षणिक वर्षाचा पहिला महिना गेल्यानंतर मार्गाचा तिढा सुटला होता. यंदाही तिच स्थिती असून आगाराकडून मार्गाबाबत पत्र पाठवूनही पहिल्या दिवशी मानव विकासच्या बसेसचे मार्ग पंचायत समितीकडून आलेले नव्हते. परिणामी जुन्याच मार्गावरून या बसेस धावत आहेत. मानव विकास निर्देशांक उंचावण्यासाठी शासनाकडून वेगवेगळ्या स्तरांवर प्रयत्न केले जात आहेत. त्यानुषंगाने मुलींच्या शिक्षणाचा टक्का वाढण्यासाठी मानव विकास मिशनने बसेसची व्यवस्था केली आहे. घरापासून शाळेपर्यंत आणि शाळेपासून घरापर्यंत मुलींच्या येण्या-जाण्याची व्यवस्था केली आहे. त्यातून दुर्गम भागातील मुलींना शाळेत जात येईल, हा त्यामागचा प्रमूख उद्देश आहे. म्हणून राज्यभरात मानव विकास मिशनच्या बसेस धावत आहेत. हिंगोली जिल्ह्यातील तीन तालुक्यात मिळून १५ बसेस धावतात. प्रतिवर्षी या बसेसचा मार्ग पंचायत समितीच्या गटविकास अधिकाऱ्यांकडून निश्चित करण्यात येतो. त्याआधी बीडीओ तिन्ही तालुक्यातील मुख्याध्यापकांकडून मुलींची पटसंख्या मागविली जाते. त्यानुसार बसेसचे मार्ग आखले जातात. नवमार्गासाठी हिंगोली आगाराकडून गटविकास अधिकाऱ्यांना पत्र पाठविण्यात आले होते. त्यावर बीडीओंनी जुन्याच मार्गाचे बसेस सुरू ठेवण्याचे सांगितले. परिणामी हिंगोली आगाराने शाळेच्या पहिल्या दिवशी जुन्याच मार्गावर बसेस सोडल्या आहेत. जुन्या मार्गावर विद्यर्थिनीच्या संख्येबाबत आगार अनभिज्ञ आहे. सख्या वाढली तर फायदाच मात्र घटलेल्या संख्येच्या ठिकाणी बसेस धावत आहे. नवीन मार्गासाठी आणखी किती दिवसाचा कालावधी लागेल, याची निश्चिती नाही. बसेसचा मुलींना फायदामानव विकास मिशनच्या बसेसचा फायदा विद्यार्थिनींना होत आहे. बसेस धावणाऱ्या तिन्हीही तालुक्यातील मुलींनी बारावीच्या निकालात मुलांपेक्षा आघाडी घेतली. विशेषत: औंढा नागनाथ तालुक्यातील विद्यार्थिंनी जिल्ह्यात सर्वाधिक म्हणजे ९६.१५ टक्के गुण मिळविले. औंढा तालुक्यातील पिंपळदरी, लोहरा, रामेश्वर आदी ठिकाणी या बसेस धावतात. एकूण पाच बसेस या तालुक्यासाठी आहेत. बसेसचे जूने मार्गहिंगोली- हिंगोली-खेर्डावाडी, हिंगोली-सिरसम-पातोंडा, सिरसम-खेर्डावाडी, हिंगोली-कनेरगाव-वाढोणा. औंढा नागनाथ- औंढा-पिंपळदरी, औंढा-माथा, औंढा-ब्रह्मवाडी, औंढा-रामेश्वर. सेनगाव- सेनगाव-पानकनेरगाव, सेनगाव-म्हाळशी, सेनगाव-जयपूर, गोरेगाव-केंद्रा बु, केंद्रा बु-जामठी, सेनगाव-साखरा. (प्रतिनिधी)