अपघात प्रकरणी चालकास शिक्षा

हिंगोली : वाहन भरधाव वेगाने व निष्काळजीपणे चालवून बैलास धडक देऊन जखमी केल्याप्रकरणी दोषी ठरवून न्यायालयाने जीप चालकास २ हजार रूपये दंडाची शिक्षा ठोठावली आहे. सेनगाव येथील प्रथमवर्ग न्यायदंडाधिकारी अ. दि. जवळकार यांनी १३ मे रोजी हा निकाल दिला. सेनगाव तालुक्यातील सिंदेफळ येथे २५ मार्च २००९ रोजी सायंकाळी ५.३० वाजण्याच्या सुमारास ही घटना घडली होती. शिवणी-आजेगाव रोडवर अनिल रमेश वाठोरे (रा. सिंदेफळ) याने आपल्या ताब्यातील काळी-पिवळी कमांडर जीप क्र. (एम. एच. ३८ बी-१३४३) हयगयीने व निष्काळजीपणे चालवून नारायण कान्होजी खताळ (रा. सिंदेफळ) यांच्या बैलास जोराची धडक दिली. या अपघातात बैलाचा पाय फ्रॅक्चर झाला. नारायण खताळ यांनी याबाबत दुसर्‍या दिवशी सेनगाव पोलिस ठाण्यात फिर्याद दिली. त्यावरून आरोपी अनिल रमेश वाठोरे याच्याविरूद्ध कलम २७९, ४२६, भादंविनुसार गुन्हा दाखल करण्यात आला. पोलिसांनी तपास करून आरोपीविरूद्ध न्यायालयात दोषारोपपत्र दाखल केले. हा खटला सेनगाव येथील प्रथमवर्ग न्यायालयात चालला. सरकारी पक्षाच्या वतीने जगन रामजी लाड, गंगाराम सखाराम लटांगळ, संदीप नारायण खताळ, सुर्यभान परसराम खताळ, भारत भानुदास लोणकर (सर्व रा.सिंदेफळ) यांच्यासह सहा साक्षीदार तपासण्यात आले. दोन्ही बाजूंचा युक्तीवाद ऐकल्यानंतर १३ मे रोजी प्रथमवर्ग न्यायदंडाधिकारी अ. दि. जवळकार यांनी खटल्याचा निकाल दिला. आरोपी अनिल रमेश वाठोरे (रा. सिंदेफळ) यास कलम २७९ भादंविनुसार १००० हजार रूपये दंड, कलम ४२६ भादंविनुसार १००० रूपये दंड अशा एकूण २००० रूपये दंडाची शिक्षा सुनावण्यात आली आहे. या खटल्यामध्ये सरकारी पक्षातर्फे विशेष सहायक सरकारी अभियोक्ता अ‍ॅड. शारदा भट्ट यांनी काम पाहिले. (प्रतिनिधी) हलगर्जीपणा कारणीभूत सेनगाव तालुक्यातील सिंदेफळ येथे २००९ मध्ये घडला होता अपघात शिवणी ते आजेगाव रोडवर वाहन वाहन भरधाव वेगाने व निष्काळजीपणे चालविल्यामुळे बैलास जखमी करण्यास चालक ठरला कारणीभूत अपघाताची पोलिसांत नोंद