तीन महिन्यांपासून ‘सीटीस्कॅन’ सुविधा बंद

उस्मानाबाद : राज्याच्या आरोग्यमंत्र्यांकडे जिल्ह्याचे पालकत्व असले तरी जिल्ह्यातील आरोग्याच्या समस्या सुटताना दिसत नाहीत़ विशेषत: जिल्हा रूग्णालयातील समस्या कायम असून, येथील अती महत्त्वाचे असलेले ‘सीटीस्कॅन’ मशीन मागील तब्बल तीन-साडेतीन महिन्यांपासून बंद पडले आहे़ सीटीस्कॅन मशीन बंद पडल्याने अपघातासह इतर आजारातील रूग्णांना हजारो रूपये खर्च करून खासगी सेंटरवर सिटीस्कॅन करून घ्यावे लागत आहे़उस्मानाबाद येथील जिल्हा रूग्णालयात शहरासह जिल्ह्याच्या विविध भागातून रूग्ण तपासणीसाठी येतात़ विविध शस्त्रक्रियांसह अचानक उद्भवलेल्या आरोग्याच्या समस्येसाठी प्रत्येकजण प्रारंभी जिल्हा रूग्णालय गाठून उपचार घेण्याला प्राधान्य देतो़ अपघातातील जखमी असो किंवा मेंदी, पोटाच्या आजारातील रूग्ण असोत या रूग्णांचे वेळप्रसंगी सिटीस्कॅन करावे लागते़ विशेषत: जिल्हा रूग्णालयात अपघातात जखमी होवून येणाऱ्यांची संख्या मोठी आहे़ जिल्ह्यात दिवसाकाठी तीन-चार अपघात होतात़ तर जिल्हा रूग्णालयात एखादा तरी अपघातातील जखमी उपचारासाठी आणण्यात येत असल्याचे दिसून येते़ अपघात असो किंवा इतर आरोग्याची अचानक उद्भवलेली समस्या असो यात प्रत्येक सेकेंदाला, मिनिटाला महत्त्व दिले जाते़ अशा परिस्थितीत सिटीस्कॅन करून त्या जखमीच्या मेंदूला, डोक्याला गंभीर दुखापत झाली की नाही हे पाहून वैद्यकीय अधिकारी पुढील उपचार देतात़ मात्र, जिल्हा रूग्णालयातील सिटीस्कॅन मशीन मागील तीन-साडेतीन महिन्यांपासून बंद पडली आहे़ मशीन बंद पडल्यानंतर संबंधित कंपनीचे कर्मचारी येवून पाहणी करून गेले़ त्यांच्या सूचेनुसार जिल्हा रूग्णालयाकडून निधीसाठीचा प्रस्ताव लातूर येथील उपसंचालक कार्यालयाकडे तर तेथून मंत्रालयातील आरोग्य विभागाकडे पाठविण्यात आला़ या प्रस्तावाला मंजुरी मिळण्यासच मोठा विलंब लागत असल्याने अद्यापही ही सिटीस्कॅन मशीन दुरूस्त झालेली नाही़ सिटीस्कॅन मशीन बंद असल्याने रूग्णांच्या नातेवाईकांना नाहक आर्थिक फटका बसत असून, मानसिक त्रासही सहन करावा लागत आहे़राज्याचे आरोग्यमंत्री दीपक सावंत यांच्याकडे पालकत्व आहे़ त्याच जिल्ह्यातील सिटीस्कॅन मशीन तीन-तीन महिने दुरूस्त होत नसल्याचे दुर्दैवी चित्र आहे़ मुंबईतून ‘व्हाया’ हैद्राबादमार्गे जिल्ह्यात प्रवेश करणारे पालकमंत्री जिल्हा रूग्णालयाला अत्याधुनिक यंत्रणा पुरविण्याकडे लक्ष देतील का ? असा प्रश्न विचारला जात आहे. (प्रतिनिधी)