औरंगाबाद : पुणे येथे नुकत्याच झालेल्या १६ वर्षांखालील राष्ट्रीय रँकिंग टेनिस स्पर्धेत औरंगाबादच्या ओम काकडने जबरदस्त कामगिरी करताना उपविजेतेपद पटकावले. ओम काकडने पहिल्या फेरीत पुणे येथील पार्थ देवरुख याच्यावर ८-२, मुंबईच्या इशन जिगली याच्यावर ८-३, पुण्याच्या तनीष जाधव याच्यावर ९-३ अशी मात केली. उपांत्य फेरीत ओम काकडने चौफेर कामगिरी करताना पुण्याच्या प्रणव गाडगीळ याच्यावर ९-४ अशी मात करीत दिमाखात अंतिम फेरीत धडक मारली. अंतिम फेरीत ओम काकड याने पुण्याच्या सिद्धार्थ मराठे याला कडवी झुंज दिली. तथापि, सिद्धार्थने हा सामना ६-४, ६-४ असा जिंकत विजेतेपदावर शिक्कामोर्तब केले, तर ओम काकडला उपविजेतेपदावर समाधान मानावे लागले. ओम काकडला प्रशिक्षक प्रवीण गायसमुद्रे यांचे मार्गदर्शन लाभले आहे.
राष्ट्रीय स्पर्धेत औरंगाबादच्या ओमला उपविजेतेपद
By लोकमत न्यूज नेटवर्क | Updated: February 20, 2019 01:15 IST