१०३ उमेदवारांची अंतिम निवड जाहीर

हिंगोली : राज्य राखीव पोलिस बल गट क्र.१२ च्या आस्थापनेवरील सशस्त्र पोलीस शिपायांच्या रिक्त असलेल्या १०३ जागांसाठी घेण्यात आलेल्या भरती प्रक्रियेचा निकाल जाहीर करण्यात आला आहे. तात्पुरत्या यादीवर एकही आक्षेप न आल्याने भरतीप्रमुख तथा अप्पर पोलिस अधीक्षक शाम घुगे, प्रभारी समादेशक ए.एल.फुफाटे यांनी उमेदवारांची अंतिम निवड यादी जाहीर केली आहे.या प्रकियेत १०३ जागांसाठी २ हजार ८९५ उमेदवारांनी अर्ज भरला होता. कागदपत्र पडताळणी तसेच उंची व छातीचे मोजमाप घेतल्यानंतर २ हजार २६५ उमेदवार मैदानी चाचणीसाठी पात्र ठरले होते. त्यातील १३५४ जण लेखी परिक्षेसाठी पात्र ठरले. परंतु परिक्षेला ४८ उमेदवार गैरहजर राहिल्याने केवळ १ हजार ३०६ उमेदवारांचीच परीक्षा घेण्यात आली. परिक्षेनंतर लगेच उत्तरपत्रिकांची तपासणी करून निकाल जाहीर करून तात्पुरत्या स्वरूपातील निवड यादी लावण्यात आली. त्यावर कुणाला आक्षेप असल्यास २४ तासाच्या आत तक्रार नोंदवण्याची सुचनाही देण्यात आली होती. परंतु याबाबत एकही तक्रार न आल्याने रविवारी दुपारी अंतिम निवड यादी जाहीर करण्यात आली. गुणवत्ता व प्रवर्गानुसार १०३ उमेदवारांची निवड करण्यात आली आहे. खुल्या प्रवर्गाच्या ४९ जागा भरताना २ प्रकल्पग्रस्त, २ खेळाडू, १ भुकंपग्रस्त व ४४ नियमित उमेदवारांना संधी देण्यात आली आहे. अनुसुचित जातीच्या ११ जागांमध्ये १ प्रकल्पग्रस्त, १ बॅन्डस्मन या उमेदवारांचा समावेश आहे. अनुसुचित जमाती-१२, डीटीए-४, एनटीबी-३, विशेष मागास प्रवर्गाच्या ६ जागांसाठी नियमित उमेदवार निवडण्यात आले आहेत. एनटीडीच्या ७ जागांमध्ये एका अनुकंपाधारकाची निवड झाली आहे. ओबीसीच्या ११ जागांमध्येही प्रकल्पग्रस्त, खेळाडू व होमगार्ड यांना प्रत्येकी १ अशा ३ जागा मिळाल्या आहेत. नांदेड जिल्ह्यातील भोकरचे अप्पर पोलीस अधीक्षक श्याम घुगे यांनी भरतीप्रमुख म्हणून काम पाहिले. एसआरपीएफचे प्रभारी समादेशक ए.एल.फुफाटे यांनी त्यांना सहकार्य केले. एसआरपीएफच्या अंतिम निवड यादीतील शेवटच्या उमेदवारांचे गुण (कट आॅफ लाईन) खुला प्रवर्ग- १७३, अनुसुचित जाती-१६६, अनुसुचित जमाती-१५३, डीटीए-१७०, एनटीबी-१६९, एनटीडी-१६६, एसबीसी-१५२, ओबीसी-१६९ असे आहेत. (प्रतिनिधी)