आखाड्यास आग लागून ५ लाखांचे नुकसान

कापडसिंगी : सेनगाव तालुक्यातील कापडसिंगी येथील शेतवस्तीवरील आखाड्यास अचानक आग लागल्याने जवळपास ५ लाखांचे नुकसान झाल्याची घटना मंगळवारी दुपारी १ वाजता घडली. कापडसिंगी येथील गट क्र. २६७ मध्ये शेकुराव काळे, शिवाजी आश्रुजी काळे यांचा आखाडा आहे. नेहमी प्रमाणे सकाळीच काम आटोपून ते शेतात भूईमुग काढण्यासाठी गेले होते. दुपारी अचानक आग लागल्याचे दिसल्याने त्यांच्या मुलाने आरडा-ओरड करून शेजार्‍यांना बोलावले पण तोपर्यंत आगीने रौद्ररुप धारण केले होते. शेतातील शेतकर्‍यांनी आग विझविण्याचा प्रयत्न केला, पण हवेचे प्रमाण जास्त असल्यामुळे आग आटोक्यात येत नव्हती. या आखाड्यावर एक बैल व म्हैस बांधलेली होती. संपूर्ण आखाड्यास आगीने वेढल्यामुळे ग्रामस्थांना आग विझविण्यात अपयश आले. यामध्ये एका बैलाचा होरपळून मृत्यू झाला तर म्हैस गंभीर जखमी झाली. यामध्ये त्यांचे गहू, ज्वारी, हरभरा, बि-बियाणे, खते शेतीपयोगी अवजारे, इंजीन, मोटार, केबल, पाईप, सायकल याच्यासह संसारोपयोगी साहित्य जळून खाक झाले. तर शेकुराव आश्रुजी काळे व शिवाजी आश्रुजी काळे या दोघा भावाच्या आखाड्यास आग लागुन ५ लाखांच्यावर नुकसान झाले. ही आग शॉटसर्किटने लागल्याचा अंदाज आहे. यावेळी शेतकर्‍यांनी पाईपने पाणी मारून आग विझविल्याने पुढील मोठा अनर्थ टळला. याबाबतची महसूल विभागाला माहिती देताच तलाठी अनिल गवई, डॉ. अनिल देशमुख, पोहेकाँ जाधव यांनी पंचनामा केला. डॉ. एस.यु. माळोदे, डॉ. कचरे, जि.प. सदस्य चंद्रकांत हराळ, तंटामुक्त अध्यक्ष चंद्रकांत यांनी घटनास्थळास भेट दिली. (वार्ताहर)