औरंगाबाद : घाटी रुग्णालयास औषधी टंचाईचे ग्रहण लागले आहे. गेल्या पाच महिन्यांपासून अनेक औषधांच्या टंचाईमुळे रुग्णालयच ‘व्हेंटिलेटर’वर असल्याने गोरगरीब रुग्णांचे हाल होत आहेत. याविषयी ‘लोकमत’ने वृत्त प्रकाशित करताच घाटी प्रशासनाने स्थानिक स्थरावर २० लाखांची औषधी खरेदी करण्याचा निर्णय घेतला आहे.
औषधी खरेदी घोटाळ्यांना पायबंद घालण्यासोबतच तिच्या खरेदीमध्ये एकसूत्रता आणण्याची जबाबदारी ‘हाफकिन’ कंपनीवर सोपविण्यात आली आहे. त्यामुळे ‘हाफकिन’ कंपनीकडूनच औषधी खरेदी होणार आहे; परंतु गेल्या काही महिन्यांपासून घाटी रुग्णालयास औषधी उपलब्ध होण्याची नुसती प्रतीक्षाच करावी लागत आहे. गेल्या पाच महिन्यांपासून मोठ्या प्रमाणावर तुटवडा निर्माण झाला आहे.
आरएल, एनएस हे सलाईन्स उपलब्ध नसल्याने रुग्णांचे हाल होत आहेत. पॅरासिटामोलसारखे प्राथमिक औषधही उपलब्ध नाही. प्रतिजैविके नाहीत. शहरात दररोज दहा ते पंधरा जणांना मोकाट कुत्रे चावा घेत आहेत, तरीही अ‍ॅन्टिरेबीज व्हॅक्सिन (एआरव्ही) उपलब्ध होत नाही. मेट फारमिन, आयसो सरबाईट, अशा मधुमेह, उच्च रक्तदाबासह महत्त्वाच्या औषधींचा ठणठणाट आहे. कफ सिरपदेखील उपलब्ध नाही. बेटाडिनसारखे प्राथमिक वैद्यकीय साहित्य नसल्याने रुग्णालयात अडचणी निर्माण होत आहेत. परिणामी, गोरगरीब रुग्णांना आर्थिक भुर्दंड सहन करून औषधींची खरेदी करावी लागत आहे. किमान महिनाभर हाफकिनकडून औषधींचा पुरवठा होण्याची परिस्थिती नाही. घाटी रुग्णालयास २०१८-१९ वर्षासाठी साडेतीन कोटी रुपयांचा निधी प्राप्त झाला आहे. या निधीतून पंधरा दिवस पुरेल इतकी औषधी खरेदी करण्याचा निर्णय घेण्यात आल्याची माहिती अधिष्ठाता डॉ. कानन येळीकर यांनी दिली.