गावकरी संतप्त : ग्रामपंचायतचे मुख्य कार्यकारी अधिका-यांना निवेदन
सावरगाव : नागभीड तालुक्यातील उश्राळ मेंढा येथील दोन अंगणवाडींना १८ सप्टेंबर २०१९ च्या पत्रानुसार मंजुरी मिळाली होती. जाहीर केलेल्या यादीत १२२ अंगणवाडयांना मंजुरी देण्यात आली. मात्र यामध्ये उश्राळ मेंढा व अन्य तीन गावांचे नाव नसल्याने डावलण्यात आल्याचा आरोप ग्रामपंचायतीने मुख्य कार्यकारी अधिका-यांकडे निवेदनातून केला आहे.
उश्राळ मेंढा ग्रामपंचायत अंतर्गत नवीन अंगणवाडी इमारत बांधकाम मंजुरीचे पत्र उपमुख्य कार्यकारी अधिकारी यांच्याकडून ग्रामपंचायला प्राप्त झाले. मात्र दीड वर्षापासून कार्यारंभाची परवानगी मिळाली नाही. येथे तीन अंगणवाड्या आहेत. यातील एक अंगणवाडी जीर्ण झाल्याने निर्लेखन करण्यात आले. नवीन इमारत नसल्याने क्रमांक दाेन व निर्लेखित केलेली एक अंगणवाडी अशा दोन्ही अंगणवाड्या एकाच ठिकाणी भरतात. ही इमारतही जीर्ण आहे. पावसाळ्यात ताळपत्री टाकावी लागते १२२ अंगणवाड्यांना जि.प. कडून मंजुरी प्राप्त झाली. यामध्ये उश्राळ मेंढा येथील दोन्ही अंगणवाडींना डावलण्यात आले आहे. प्रशासकीय आदेश असूनही इमारत बांधकामाची अंमलबजावणी झाली नाही. आवश्यकता व प्राधान्यक्रमांकानुसार नव्हे तर मनमर्जीतून यादी तयार केली आहे, असा आरोप गावक-यांनी केला. हा अन्याय दूर करण्याची मागणी ग्रामपंचायतीने जि. प. मुख्य कार्यकारी अधिका-यांकडे निवेदनातून केली. शिष्टमंडळात जि.प.सदस्य नयना गेडाम, सरपंच हेमराज लांजेवार, ग्रा. पं.सदस्य प्रभाकर सेन्द्रे,आशा बोरकर, शेवंता बोरकर, सविता सयाम आदींचा समावेश होता.
न्याय न मिळाल्यास आंदोलन
जि. प. ने निर्लेखित केलेली अंगणवाडी जीर्ण इमारतीतच तर एक नवीन समाजमंदिरात भरते. ही अडचण लक्षात घेऊन गावात नवीन अंगणवाडी उभारणे आवश्यक होते. न्याय न मिळाल्यास अंगणवाडीला कुलूप ठोकण्याचा इशारा ग्रामपंचायतने दिला.
कोट
आलेवाही, सावर्ला, उश्राळ मेंढा, जीवनापूर येथील अंगणवाडयांना मंजुरी मिळाली. परंतु डावलण्यात आले व नव्या गावांना अंगणवाडीची मंजुरी दिली. हा या क्षेत्रावर अन्याय आहे.
- नयना गेडाम, सदस्य जि. प. वाढोणा -गिरगांव जि.प.क्षेत्र