बिबट्याचा बालिकेवर हल्ला

ब्रह्मपुरी तालुक्यातील चिचगाव (डोर्ली) येथील आठ वर्षीय बालिकेवर घराच्या समोर रात्री ८.३० वाजताच्या दरम्यान बिबट्याने हल्ला करीत जबड्यात पकडले. मात्र जवळच असलेल्या मुलीच्या वडिलांनी बिबट्याचा पाय पकडून त्याच्या जबड्यातून मुलीला सोडवण्याचा प्रयत्नात आरडाओरड केली.

ठळक मुद्देबंदोबस्त करण्याची मागणी : गावकऱ्यांच्या सतर्कतेने जीव वाचला

लोकमत न्यूज नेटवर्कगंगालवाडी : ब्रह्मपुरी तालुक्यातील चिचगाव (डोर्ली) येथील आठ वर्षीय बालिकेवर घराच्या समोर रात्री ८.३० वाजताच्या दरम्यान बिबट्याने हल्ला करीत जबड्यात पकडले. मात्र जवळच असलेल्या मुलीच्या वडिलांनी बिबट्याचा पाय पकडून त्याच्या जबड्यातून मुलीला सोडवण्याचा प्रयत्नात आरडाओरड केली. लगेच गावकरी धावल्याने मुलीचे प्राण वाचले.एकाच आठवड्यात परिसरातील ही दुसरी घटना असल्याने गावकाऱ्यांमध्ये भीतीचे वातावरण पसरले आहे. बिबट्याचा ताबडतोब बंदोबस्त करा, अशी मागणी गावकरी करीत आहेत.हा अंगावर शहारे आणणारा भयावह प्रसंग चिचगाव येथील ऐश्वर्या राजेश्वर अलोणे या बालिकेवर ओढवला. राजेश्वर अलोणे व मुलगी ऐश्वर्या जेवणानंतर गावातील वीज पुरवठा खंडित झाला असल्याने घराच्या अंगणात उभे होते. त्याचवेळी अंधारात घराजवळच दबा धरून बसलेल्या बिबट्याने ऐश्वर्यावर हल्ला करीत ऐश्वर्याची मान जबड्यात पकडली. त्याच वेळी राजेश्वरने बिबट्याचा मागचा पाय पकडून मुलीचे प्राण वाचविण्यासाठी आरडाओरड सुरू केली व क्षणात गावातील लोक गोळा झाले. अखेर बिबट्याने जवळपास ३०० मीटर अंतरावर ऐश्वर्याला सोडले व जंगलाच्या दिशेने धूम ठोकली. क्षणाचाही विलंब न लावता राजेश्वरने गावकऱ्यांच्या मदतीने जखमी अवस्थेत ऐश्वर्याला ब्रह्मपुरी येथील ग्रामीण रुग्णालयात उपचारार्थ दाखल केले. झाल्या प्रकाराची माहिती वनविभागाला देण्यात आली. वनविभागाचे कर्मचारीदेखील ग्रामीण रुग्णालयात आले. ऐश्वर्याच्या जखमांवर उपचार करण्यात आला. तिची प्रकृती आता चिंताजनक आहे. मात्र एकाच आठवड्यात परिसरात दोनदा बिबट्याने हल्ला केल्याने भीतीचे वातावरण पसरले आहे.विजय वडेट्टीवारांनी घेतली दखलदरम्यान क्षेत्राचे आमदार विजय वडेट्टीवार हे एका कार्यक्रमानिमित्याने ब्रह्मपुरी येथे मुक्कामी होते. त्यांना घटनेची माहिती देण्यात आली. आ.वडेट्टीवार यांनी तत्काळ ग्रामीण रुग्णालयाकडे धाव घेतली. रुग्णालयात येताच ऐश्वर्याच्या उपचाराची व प्रकृतीची विचारपूस करीत आणखी चांगले उपचार करण्यासाठी मुलीचे वडील राजेश्वर यांना तात्काळ आर्थिक मदत केली.यावेळी उपस्थित वनविभागाचे अधिकारी यांना बिबट्याचा ताबडतोब बंदोबस्त करा. जंगलव्याप्त गावाशेजारील वाढलेले गवत काढून वन्यप्राण्यांना दबा धरण्यासारखी ठिकाणे नष्ट करा अश्या सूचना दिल्या.उपस्थित वनपरिक्षेत्र अधिकारी आशा चौहान व नायगमकर यांनी मुलीच्या उपचाराचा सर्व खर्च वनविभाग करेल व गावालगत असलेले गवत काढण्याची कार्यवाही लवकरच करण्यात येईल, असे आश्वस्त केले. यावेळी जि. प.सदस्य प्रा.राजेश कांबळे, प्रमोद चिमूरकर, माजी नगरसेवक विलास विखार, गोवर्धन दोनाडकर, प्रा. श्याम कंरबे व चिंचगाव ग्रामवासीय उपस्थित होते.