ब्रह्मपुरी : शहरातील क्रिष्णा कॉलनी परिसरात मागील अनेक वर्षांपासून विकास कामे करण्यात आली नसल्याचा, आरोप या भागातील नागरिकांनी केला आहे. नगरपरिषदेच्या उदासीन धोरणामुळे येथील स्थानिक नागरिकांना अनेक समस्यांना तोंड द्यावे लागत आहे.
या समस्या सोडविण्यासाठी नगरपरिषदेने जातीने लक्ष द्यावे, अशी मागणी या परिसरात राहणारे नागरिक करीत आहेत. जोपर्यंत येथील प्रमुख समस्या नगरपरिषद सोडविणार नाही, तोपर्यंत आम्ही टॅक्स भरणार नाही, अशी कठोर भूमिका घेतली असून, टॅक्स वसुलीसाठी आलेल्या नगरपरिषदेच्या कर्मचाऱ्यांना खडेबोल सुनावत माघारी पाठविण्यात आले असल्याचा धक्कादायक प्रकार घडला आहे.
सदर वसाहत बसून जवळपास १० ते १२ वर्षे पूर्ण झाली. परंतु आजतागायत या परिसरात पक्के रस्ते, नाल्या, नळयोजना अशा प्रकारच्या कोणत्याही सुविधा उपलब्ध करून दिल्या नाहीत. प्रत्येक वेळी सोयीसुविधा उपलब्ध करुन देण्याचे आश्वासन दिल्या जाते. परंतु निवडणुकीनंतर निवडून आलेल्या नगरसेवकांना दिलेल्या आश्वासनांचा विसर पडतो. त्यामुळे हा परिसर पूर्णपणे मागासलेल्या अवस्थेत आहे.
या परिसरातील मुख्य रस्त्यावर जागोजागी मोठमोठ्या गटारी तुंबलेल्या असून घरा-घरातील तसेच गटारीचे सांडपाणी रस्त्यावर वाहत आहे. त्यामुळे येथील नागरिकांचे आरोग्य धोक्यात आले आहे.
सदर परिसरातील नागरिकांची लोकसंख्या दिवसेंदिवस वाढतच जात आहे. परंतु येथे कोणत्याही नागरी सुविधा पुरविण्यात येत नाही. मागील १२ वर्षांपासून हा परिसर विकास कामापासून पूर्णपणे दुर्लक्षित आहे. दरवेळेस या भागाकडे मुद्दामहून दुर्लक्ष केल्या जाते. या संदर्भात येथील नागरिकांनी नगर परिषदेला अनेक वेळा निवेदने दिलेली आहेत. मात्र आजतागायत कोणीही येथील समस्यांची दखल घेतली नाही. नगर परिषदेने तात्काळ या भागाकडे जातीने लक्ष देऊन रस्त्यांची,नाल्यांची,पिण्याच्या पाण्याची,सांडपाणी प्रक्रिया वाहून नेण्याची समस्या सोडवावी अशी मागणी करण्यात येत आहे.
बॉक्स
६५ लाखांचे अंदाजपत्रक तयार
सध्याच्या परिस्थितीत वाढीव पाणीपुरवठा योजने अंतर्गत शहरात मोठ्या प्रमाणावर नळ योजनेचे पाईपलाईन टाकणे सुरू आहे. क्रीष्णा कॉलनीतसुद्धा पाईपलाईन टाकणे सुरु असल्याने सध्याच्या परिस्थितीत सर्व कामे ठप्प ठेवण्यात आली आहेत. क्रीष्णा कॉलनीत ६५ लाख रुपयांचे अंदाजपत्रक तयार करण्यात आले असून येत्या सहा महिन्यात येथील रस्ते, नाल्या आणि नळयोजना पुर्ण करण्यात येणार आहे. त्याचबरोबर खुल्या भूखंडावर ग्रीन जीम बनविण्यात येणार आहे,अशी माहिती गटनेते तथा बांधकाम सभापती विलास विखार यांनी दिली.