शेतकऱ्यांनी फळबाग योजनेचा लाभ घ्यावा : मयूर कळसे

महात्मा गांधी राष्ट्रीय ग्रामीण रोजगार हमी योजनेमधील तरतुदींनुसार शेतकऱ्यांच्या शेतावर आणि बांधावर तसेच पडीक असलेल्या शेतजमिनीवर फळबाग लागवड कार्यक्रम कृषी व फलोत्पादन विभागाच्या वतीने हाती घेण्यात आला आहे. चंद्रपूर जिल्हा परिषदेचे मुख्य कार्यपालन अधिकारी राहुल कर्डिले यांच्या सूचनेनुसार सदर योजना ही शेतकऱ्यांच्या हिताची आहे. त्यामुळे फळबाग लागवड योजना यशस्वी करण्याचा प्रयत्न केला जात आहे. यासाठी १ जून २१ ते ३० ऑक्टोबर २१ पर्यंत फळलागवडीची मुदत दिलेली आहे. या योजनेंतर्गत प्रत्येक ग्राम पंचायत स्तरावर राबविण्यात येणाऱ्या या कार्यक्रमाचे प्रशासनाचे वेळापत्रक निश्चित केले आहे. ग्राम पंचायत स्तरावर फळबाग योजनेची जनजागृती करण्यात येणार आहे. या कार्यक्रमांतर्गत आंबा, काजू, बोर, सीताफळ, आवळा, चिंच, कवठ, जांभूळ, कोकम, फणस, बांबू, करंज, नारळ, पेरू, लिंबू, साग, गिरीपुष्प, सोनचाफा, कडीपत्ता, कडुलिंब, सिंधी, शेवगा, चिंच, जटोफा व इतर औषधीयुक्त वनस्पतींची लागवड करण्यात येणार आहे, असे मयूर कळसे यांनी सांगितले आहे.