चंद्रपूर : चिचपल्ली येथील बांबू शिक्षण व प्रशिक्षण केंद्र हा चंद्रपूर जिल्ह्याचा गौरव जागतिक पातळीवर व्हावा अशा पध्दतीचा प्रकल्प आहे. रोजगार निर्मितीच्या प्रक्रियेमध्ये हा प्रकल्प निश्चितच मैलाचा दगड ठरणार आहे. या प्रकल्पाच्या उभारणीच्या कामात कोणतीही चूक होता कामा नये, भविष्यात आगीपासून प्रकल्पाच्या इमारतींचे पूर्णपणे संरक्षण व्हावे याचा सखोल अभ्यास करुन त्यादृष्टीने उपाययोजना कराव्या, अशा सुचना विधीमंडळ लोकलेखा समितीचे प्रमुख, माजी अर्थ व वनमंत्री आमदार सुधीर मुनगंटीवार यांनी दिल्या.
मंगळवारी आमदार सुधीर मुनगंटीवार यांनी चिचपल्ली येथील बांबू संशोधन केंद्राला भेट देत पाहणी केली. बांबू संशोधन व प्रशिक्षण केंद्राच्या ज्या समस्या आहेत, त्यासंबंधी एक सादरीकरण तयार करण्याच्या सूचना त्यांनी यावेळी दिल्या. सदर सादरीकरण केंद्रीय वने व पर्यावरण मंत्री प्रकाश जावडेकर यांच्या समक्ष करून हे केंद्र आंतरराष्ट्रीय दर्जाचे व्हावे यादृष्टीने आपण प्रयत्न करणार असल्याचे सांगून पुन्हा नव्याने इमारत उभारताना जरी सिमेंटची उभारली तरीही त्याचे दर्शनिय स्वरुप बांबू सारखे असावे, असेही ते म्हणाले. यासाठी आवश्यक निधीची मागणी विभागाने करावी, आपण त्याचा पाठपुरावा करु असे आ. मुनगंटीवार म्हणाले. यावेळी चंद्रपूर वनवृत्ताचे मुख्य वनसंरक्षक प्रविण, बांबू संशोधन व प्रशिक्षण केंद्राच्या संचालक अपर्णा, सार्वजनिक बांधकाम मंडळाच्या अधिक्षक अभियंता सुषमा साखरवाडे, कार्यकारी अभियंता भास्करवार, भाजपा नेते रामपाल सिंह, जिल्हा परिषद सदस्य गौतम निमगडे यांची प्रामुख्याने उपस्थिती होती.