चंद्रपूर : कोरोनाच्या पार्श्वभूमीवर राज्य शैक्षणिक संशोधन व प्रशिक्षण परिषद पुणेने पहिली ते दहावीच्या विद्यार्थ्यांसाठी स्वाध्याय स्टुटंड व्हाॅट्स ॲप बेस्ट डिजिटल होम असायमेंट योजना सुरु केली आहे. या माध्यमातून विद्यार्थ्यांना अभ्यासक्रमासोबत जोडून ठेवण्याचा प्रयत्न सुरु केला आहे. दरम्यान, राज्यात चंद्रपूर जिल्हा सर्वाधिक म्हणजेच ५६ हजार ९४२ विद्यार्थ्यांनी यात सहभाग नोंदवित प्रथम क्रमांकावर आहे. तर दुसऱ्या स्थानावर सातारा जिल्ह्याचा क्रमांक आहे.
कोरोनामुळे यावर्षी शैक्षणिक वर्ष धोक्यात आले आहे. त्यामुळे राज्यातील विद्यार्थी मागे पडू नये, ते अभ्यासक्रमासोबत जोडून रहावे यासाठी संपर्क आणि संवादाचे माध्यम म्हणून व्हाॅट्स ॲप वापरून सरावासाठी स्वाध्याय उपक्रम करून देण्यात आला आहे. या माध्यमातून पहिली ते दहावीपर्यंतच्या विद्यार्थ्यांना फोनवर क्विझ ( प्रश्नमंजुषा) घरच्या घरी उपक्रम करून देण्यात येत आहेत. यासाठी येथील जिल्हा परिषदषेचे मुख्यकार्यपालन अधिकारी राहुल कर्डिले, तसेच डायटचे प्राचार्य धनंजय चाफले यांनी विशेष प्रयत्न करून अधिकाधिक विद्यार्थ्यांना जोडण्याचा प्रयत्न केला. याचाच फायदा झाला असून चंद्रपूर जिल्हा राज्यात प्रथम क्रमांकावर आला आहे. तर सातारा दुसऱ्या तसेच कोल्हापूर जिल्हा तिसऱ्या स्थानावर आहे.
बाॅक्स
दर शनिवारी सराव
या उपक्रमांतर्गत दर शनिवारी विद्यार्थ्यांना व्हॅाट्स ॲपवर प्रश्न पाठविले जात असून त्याद्वारे विद्यार्थ्यांच्या ज्ञानात भर टाकली जात आहे. विशेष म्हणजे, तत्काळ प्रश्नाचे उत्तर बरोबर की, चुक हे आणि गुण दर्शविल्या जात असल्याने विद्यार्थी आवडीने हे प्रश्न सोडवित आहे. विशेष म्हणजे, दुर्गम भागातील तालुक्यातील विद्यार्थ्यांनीही यामध्ये मोठ्या संख्येने सहभाग नोंदविला आहे.
कोट
या उपक्रमाचा विद्यार्थ्यांना अधिकाधिक फायदा व्हावा यासाठी विशेष प्रयत्न करण्यात आले. शिक्षक, केंद्रप्रमुख, डायट प्राचार्यांनी परिश्रम घेतले. त्यामुळे आजघडीला ५६ हजार विद्यार्थी लाभ घेत आहेत. यानंतरही सर्वांच्या प्रयत्नामुळे ही संख्या आणखी वाढेल, असा विश्वास आहे.
-राहुल कर्डिले
मुख्य कार्यपालन अधिकारी, चंद्रपूर