चंद्रपूर : आपल्या दबंग शैलीतून नागरिकांची कामे करून देणारा नेता म्हणून खासदार धानोरकर यांची ओळख होती. त्यांच्या याच शैलीमुळे प्रशासनावरही त्यांची चांगली पकड होती. त्यांच्या निधनाची वार्ता मन हेलावणारी असून, त्यांच्या निधनाने राजकारणातील दबंग आवाज कायमचा हरपला, अशा शब्दांत चंद्रपूर मतदार संघाचे अपक्ष आमदार किशोर जोरगेवार यांनी शोक व्यक्त केला.
शिवसेनेत असतांना खासदार बाळू धानोरकर यांच्यासोबत काम केले. त्यामुळे त्यांची काम करण्याची पद्धत जवळून पाहता आली. स्पष्ट बोलणारा नेता म्हणून त्यांची ओळख होती. राजकीय गणिताची त्यांना अचूक समज होती. त्यामुळेच ते शिवसैनिक ते खासदार असा प्रवास सहज करू शकले. २००९ च्या विधानसभा निवडणुकीत त्यांचा पराभव झाला. पण ते खचले नाहीत. पुन्हा नव्या जिद्दीने काम करत त्यांनी २०१४ ची निवडणूक जिंकली. नंतर लोकसभेसाठी उभे राहत ते खासदार झाले. या प्रवासात अनेक कार्यकर्ते त्यांनी उभे केले. कार्यकर्त्यांना मोठे केले. आज त्यांच्या जाण्याने असंख्य कार्यकर्तेही पोरके झाले असल्याचे आमदार किशोर जोरगेवार यांनी आपल्या शोकसंदेशात म्हटले आहे.