चंद्रपूर : जिल्ह्यात कोरोनावर मात करणाºया नागरिकांच्या संख्येने २० हजाराचा टप्पा ओलांडला आहे. तसेच अ‍ॅक्टीव्ह पॉझिटिव्ह रुग्णांच्या संख्येतदेखील झपाटयाने घट होत असून महिन्याभरापूर्वी २५०० वर असलेली अ‍ॅक्टीव्ह रुग्णांची संख्या आता ८४१ वर आल्याने नागरिकांना काहिसा दिलासा मिळाला आहे.
शनिवारी २४८ जणांनी कोरोनावर मात केल्याने त्यांना रुग्णालयातून सुटी देण्यात आली आहे. तर ८६ कोरोनाबाधित रुग्णांची नव्याने भर पडली असून दोन कोरोनाबाधितांचा मृत्यू झाला आहे.
जिल्ह्यात आतापर्यंत एकूण बाधितांची संख्या २१ हजार २६६ वर पोहोचली आहे. तसेच सुरवातीपासून आतापर्यंत बरे झालेल्यांची संख्या २० हजार ९१ झाली आहे. सध्या ८४१ बाधितांवर उपचार सुरू आहे. जिल्ह्यात आतापर्यंत एक लाख ५९ हजार ७८४ नमुन्यांची तपासणी करण्यात आली असून त्यापैकी एक लाख ३६ हजार ३९८ नमुने निगेटीव्ह आले आहेत.
शनिवारी बाधित झालेल्या ८६ रुग्णांमध्ये चंद्रपूर मनपा क्षेत्रातील २७, चंद्रपूर तालुक्यातील नऊ, बल्लारपूर तीन, भद्रावती सहा, ब्रम्हपुरी सात, नागभीड पाच, सिंदेवाही दोन, मूल पाच, सावली एक, राजुरा सात, चिमूर तीन, वरोरा सहा, कोरपना तीन तसेच इतर ठिकाणच्या दोन रुग्णांचा समावेश आहे. नागरिकांनी स्वत:च्या आरोग्याबाबत जागरूक राहावे, बाहेर निघतांना नियमितपणे मास्कचा वापर करावा, वेळोवेळी हात स्वच्छ करावे तसेच प्रशासनाने घालून दिलेल्या नियमांचे पालन करावे, असे आवाहन जिल्हाधिकारी अजय गुल्हाने यांनी केले आहे.
बॉक्स
दोघांचा मृत्यू
शनिवारी जिल्ह्यात कोरोनामुळे दोघांचा मृत्यू झाला आहे. यात नगिनाबाग, चंद्रपूर येथील ८३ वर्षीय पुरूष व गडचिरोली जिल्ह्यातील ६५ वर्षीय महिलेचा समावेश आहे. जिल्ह्यात आतापर्यंत ३३४ बाधितांचा मृत्यू झाला असून यापैकी चंद्रपूर जिल्ह्यातील ३०७, तेलंगणा एक, बुलडाणा एक, गडचिरोली १६, यवतमाळ सात, भंडारा एक आणि वर्धा येथील एका बाधिताचा समावेश आहे.