दुसरबीड / मलकापूर पाग्रा : समृद्धी महामार्गावर कारला ट्रकने पाठीमागून जबर धडक दिल्याने झालेल्या अपघातामध्ये एक महिला ठार झाली. ही घटना १३ डिसेंबर रोजी नागपूर कॉरिडॉरवर दुपारी दुसरबीड टोल प्लाझाजवळ घडली.
शोभा ठाकूर (५५) असे मृत महिलेचे नाव आहे. (एमएच-३१-डीके-५६४०) क्रमांकाच्या कारद्वारे मुलगा आकाश ठाकूर (३५) सह त्या पुण्यावरून नागपूरकडे जात होत्या. दरम्यान, लघुशंकेसाठी समृद्धी महामार्गावर चायनेज ३१७.४ वर ते थांबले असता पाठीमागून येणाऱ्या (एमएच-१४-केए-३२३०) क्रमांकाच्या ट्रकने त्यांच्या कारला मागील बाजूने धडक दिली.
ट्रकचालक भागवत कदम (रा. राणीसावगर, जि. परभणी) याचे वाहनावरील नियंत्रण सुटल्याने हा अपघात झाल्याचे महामार्ग पोलिस सूत्रांचे म्हणणे आहे. त्यात गंभीर जखमी झालेल्या शोभा ठाकूर यांना त्वरित रुग्णवाहिकेद्वारे बीबी रुग्णालयात उपचारासाठी दाखल करण्यात आले. मात्र उपचारादरम्यान त्यांचा मृत्यू झाला. अपघाताची माहिती मिळताच पोलिस उपनिरीक्षक राजू गायकी, पोलिस हेड कॉन्स्टेबल प्रवीण राणे आणि पोलिस कॉन्स्टेबल संदीप किरकेंसह रुग्णवाहिका चालक डिगांबर शिंदे, डॉ. वैभव बोराडे हे घटनास्थळी पोहोचले.
गंभीर जखमी महिलेस बिबी येथील ग्रामीण रुग्णालयात उपचारासाठी हलविण्यात आले. मात्र तेथे महिलेचा उपचारादरम्यान मृत्यू झाल्याचे सूत्रांनी सांगितले.