अंढेरा : खरीप हंगामास सुरुवात हाेऊन महिना लाेटला असला तरी अनेक शेतकऱ्यांना अजूनही पीककर्ज मिळालेले नाही़ त्यातच अंढेरा येथील विदर्भ कोकण ग्रामीण बँकेचे शाखाधिकारी सुटीवर गेल्याने शेतकऱ्यांना पीक कर्जासाठी बँकेत फेऱ्या माराव्या लागत आहेत. याकडे वरिष्ठांनी लक्ष देऊन पर्यायी व्यवस्था करण्याची मागणी परिसरातील शेतकऱ्यांनी केली आहे.
विदर्भ कोकण ग्रामीण बँकेची शाखा अंढेरा येथे असून, या शाखेअंतर्गत सेवानगर, पिप्री आंधळे, मेंडगाव, बायगाव, सावखेड नागरे, शिवणी आरमाळ हे गावे येतात. सध्या पेरणीचे दिवस सुरू असताना सगळीकडे पीककर्ज वाटप सुरू आहे. अंढेरा येथे मात्र येथील शाखेचे व्यवस्थापक हे गेल्या पंधरा दिवसांपासून सुटी असल्याने पीक कर्जवाटप रखडलेले आहे़
विदर्भ कोकण ग्रामीण बँकेच्या शाखा व्यवस्थापकांना नव्याने पीक कर्जवाटपाचे अधिकार मिळाले आहेत. शाखा व्यवस्थापक गौरव जगताप सुटीवर असल्याने शेतकऱ्यांना पीककर्जासाठी बँकेत फेऱ्या माराव्या लागत असल्याचे चित्र आहे. नव्याने पीककर्ज मागणीसाठी या भागातील शेतकऱ्यांनी देऊळगाव मही येथील बँकेकडे मागणी केली असता तुमचे कार्यक्षेत्र या बँकेकडे येत नसल्याचे कारण सांगण्यात आले.
अनेक शेतकऱ्यांवर दुबार पेरणीचे संकट
मृग नक्षत्रात पडलेल्या पावसाच्या बळावर अनेक शेतकऱ्यांनी पेरणी केली हाेती. त्यानंतर दहा ते १५ दिवसांपासून पावसाने दडी मारल्याने अनेक शेतकऱ्यांवर दुबार पेरणीचे संकट आले आहे. तसेच अनेक शेतकऱ्यांच्या पेरण्या खाेळंबल्या आहेत. पीककर्ज मिळेल या आशेवर शेतकऱ्यांनी उसनवारी करून पेरणी केली आहे़ मात्र, महिना लाेटल्यानंतरही शेतकऱ्यांना पीककर्ज मिळत नसल्याचे चित्र आहे. याकडे वरिष्ठांनी लक्ष देण्याची गरज आहे. दरम्यान, याविषयी जिल्हा अग्रणी बँकेचे व्यवस्थापक नरेश हेडाऊ यांच्याशी संपर्क केला असता अंढेरा येथे लवकरच पर्यायी शाखा व्यवस्थापक पाठवण्यात येईल, असे त्यांनी सांगितले.
सहायक व्यवस्थापकांकडे दिला प्रभार
परिसरातील शेतकऱ्यांना पीककर्ज मिळण्यासाठी हाेत असलेला विलंब पाहता जिल्हा अग्रणी बॅंकेच्या व्यवस्थापकांनी सहायक व्यवस्थापक विनायक पाठक यांच्याकडे विदर्भ कोकण ग्रामीण बँकेच्या अंढेरा शाखेचा पदभार दिला आहे़ त्यामुळे, शेतकऱ्यांना दिलासा मिळणार आहे. पीक कर्जवाटपाची गती वाढवण्याची गरज आहे.