चार तहसिलदारांच्या बदल्या; बुलडाण्यातील एकाचा समावेश

बुलडाणा: निवडणूक आयोगाच्या संदर्भीय पत्रानुसार अमरावती विभागातील तहसिलदार संवर्गातील चार अधिकार्यांच्या बदल्या करण्यात आल्या आहेत. दरम्यान, निवडणुकीच्या अनुषंगाने ज्या अधिकार्यांच्या बदल्या झाल्या आहेत, त्यांनी त्वरेने त्यांना दिलेल्या पदस्थापनेच्या ठिकाणी त्वरेने रूजू होणे क्रमप्राप्त आहे. यामध्ये बुलडाण्याचे तहसिलदार सुरेश बगळे यांची बुलडाणा जिल्हाधिकारी कार्यालयात सामान्य प्रशासन विभागात तहसिलदार म्हून तर अमरावती येथील जिल्हाधिकारी कार्यालयात महसूल विभागात कार्यरत असलेले तहसिलदार एस. जे. शिंदे यांची बुलडाणा तहसिलदारपदी नियुक्ती करण्यात आली आहे. दरम्यान, यवतमाळ येथील केळापूरचे तहसिलदार एस. आर. शेळके यांची यवतमाळ येथे सहायय्क जिल्हा पुरवठा अधिकारी म्हणून बदली करण्यात आली आहे. यासोबतच यवतमाळ येथील सहाय्यक जिल्हा पुरवठा अधिकारी आर. ए. काळे यांची केळापूर तहसिलदारपदी बदली करण्यात आली आहे. अमरावती विभागीय आयुक्तांनी याबाबत सुचीत केले असून संबंधित जिल्हाधिकारी यांनी या आदेशाची तत्काळ अंमलबजावणी करून उक्त नमूद अधिकार्यांनी पदस्थापनेच्या पदावर तत्काळ रूजू व्हावे, असे स्पष्ट करण्यात आले आहे. ११ मार्च रोजी यासंदर्भातील आदेश निर्गमित करण्यात आला आहे.