सीईटी होईल की नाही, अकरावीत प्रवेश कसा मिळेल, असा प्रश्न उपस्थित झाला आहे. दहावीचा निकाल लागून आठवडा उलटला तरी अकरावी प्रवेशाच्या हालचाली दिसत नाहीत. अकरावी प्रवेशासाठी शासनाने सीईटी परीक्षाघेण्याचे जाहीर केले. परंतु दोन दिवसांतच सीईटीची वेबसाइट बंद केली, त्याचे कारणही समजू शकले नाही. त्यामुळे विद्यार्थ्यांमधील संभ्रम वाढला आहे. अकरावीचे प्रवेश ऑनलाइन पद्धतीने होतील की सीईटी परीक्षेच्या माध्यमातून होतील. याविषयीची कोणतीच कल्पना विद्यार्थ्यांना नाही. यंदा बुलडाणा जिल्ह्याचा निकाल ९९.९८ टक्के लागला आहे. सर्वांनाच अकरावी प्रवेशाची घाई झाली आहे. परंतु सीईटीची वेबसाइट बंद आहे.
सीईटी वेबसाइट हँग
२०२०-२१ या शैक्षणिक वर्षासाठी इयत्ता अकरावी प्रवेशासाठी सामायिक प्रवेश प्रक्रिया (सीईटी) परीक्षा २१ ऑगस्ट रोजी घेण्यात येणार आहे.
दहावी परीक्षा उत्तीर्ण विद्यार्थ्याना ऑनलाइन पद्धतीने http://cet.mh-ssc.ac.in या संकेतस्थळावर अर्ज भरण्याची सुविधा मंडळामार्फत २० जुलैपासून ते २६ जुलैपर्यंत उपलब्ध करून दिली होती. परंतु तांत्रिक कारणास्तव संकेतस्थळ तूर्त बंद करण्यात आले आहे.
परीक्षेचे अर्ज भरण्यासाठी विद्यार्थ्यांना पुरेसा कालावधी देण्याच्या सूचना शिक्षण मंडळाने दिल्या आहेत.
सीईटी तयारी कशी कराल?
दहावीची परीक्षा ही वस्तुनिष्ठ प्रश्‍नावर असते. परंतु सीईटी परीक्षा ही पर्यायी प्रश्‍नांवर होणार आहे. त्यामुळे विद्यार्थ्यांनी दहावीच्या अभ्यासक्रमाची तयारी करावी. पर्यायी प्रश्‍नांची तयारी करावी. परीक्षेचा धसका घेऊ नये. कारण, ही अकरावी प्रवेशासाठी परीक्षा आहे. यापुढील सर्व परीक्षा पर्यायी प्रश्‍नांवर आधारित असल्याने विद्यार्थ्यांना सीईटी परीक्षेचा फायदाच होईल, असे मत शिक्षणतज्ज्ञांमधून व्यक्त होत आहे.
दहावी पास विद्यार्थी - ३८४१५
अकरावीसाठी एकूण जागा - ४४०००