पेठ नजीक टँकर-मालवाहूची धडक, एक ठार एक गंभीर

याबाबत शेगाव येथील श्यामराव सावेकर (४५, रा.श्रीकृष्णनगर) यांनी अमडापूर पोलीस ठाण्यास माहिती दिली. त्यानुसार, या अपघातामध्ये एमएच-२८-बीबी-१७४४ क्रमांकाच्या मालवाहू वाहनाचा चालक शंकर श्यामराव सावेकर हा अपघातामध्ये मृत्यू पावला. तो चिखली येथून शेगावकडे वाहनाद्वारे परत जात असताना, पेठ पुलाजवळील वळण रस्त्यावर चिखलीकडे भरधाव वेगाने जाणाऱ्या टँकरची (क्रमांक एमएच-२६-एच-३२१८) व सावेकर यांच्या वाहनाची धडक झाली. त्यात मालवाहू वाहनाचा चालक शंकर शामराव सावेकर हा जागीच ठार झाला, तर मुकेश लखन खेडले हा गंभीर जखमी झाला आहे. त्याला उपचारासाठी खामगाव येथील रुग्णालयात हलविण्यात आले आहे. या प्रकरणी टँकर चालकाविरोधात अमडापूर पोलिसांनी गुन्हा दाखल केला आहे. दरम्यान, घटनेचा पुढील तपास ठाणेदार नागेश चतरकर यांच्या मार्गदर्शनाखाली पोलिस हेड कॉन्स्टेबल गीते हे करीत आहेत.