संग्रामपूर तहसील कार्यालयात आत्मदहनाचा प्रयत्न

दप्तरदिरंगाईला कंटाळल्याने महिलेचा पवित्रा.

संग्रामपूर (बुलडाणा): वारंवार चकरा मारूनही कामास टाळाटाळ होत असल्याने कंटाळलेल्या तालु क्यातील निवाणा येथील मागासवर्गीय विधवा महिलेने आज १९ डिसेंबरच्या सायंकाळी तहसील कार्यालयात अंगावर रॉकेल घेऊन आत्मदहनाचा प्रयत्न केला. या प्रकारामुळे आज येथील तहसील कार्यालयात एकच खळबळ उडाली होती. तालुक्यातील निवाणा येथील ३९ वर्षीय पंचशीला बाबुराव इंगळे या विधवा महिलेने दीड वर्षापूर्वी आम आदमी विमा योजना व संजय गांधी निराधार योजनेच्या लाभासाठी चव्हाण नामक तलाठय़ाकडे कागदपत्रे दिली होती; मात्र त्यांना लाभ देण्यास टाळाटाळ करण्यात येत होती. शेतमजुरी करून तहसील कार्यालयात चकरा मारून थकल्यानंतर अखेर आज १९ डिसेंबरच्या सायंकाळी पंचशीला इंगळे यांनी तहसीलदार यांचे कॅबिनसमोर व्हरांड्यात अंगावर रॉकेल ओतून आत्मदहनाचा प्रयत्न केला; मात्र उपस्थि तांच्या हा प्रकार लक्षात आल्याने त्यांनी त्यांनी पंचशीला इंगळे यांची समजूत काढत त्यांना आत्मदहना पासून परावृत्त करण्याचा प्रयत्न केला. तर याचवेळी तहसीलदार यांचे कॅबिनमध्ये उपविभागीय अधिकारी धनंजय गोगटे हेसुद्धा उपस्थित होते. या घटनेमुळे तहसील परिसरात एकच खळबळ उडाली. यानंतर याबाबतची माहिती तामगाव पोलिसांना देण्यात आली. त्यानंतर पोउपनि परदेशी यांच्यासह इतर कर्मचार्‍यांनी तहसील कार्यालयात येवून पंचशीला इंगळे यांना ताब्यात घेतले होते.