गतवर्षी मार्च महिन्यापासून आलेल्या कोरोना संकटामुळे एस.टी. महामंडळाला खूप मोठी आर्थिक झळ बसली. पहिल्या व दुसऱ्या लाटेत लागू करण्यात आलेल्या टाळेबंदीमुळे एस.टी.चे उत्पन्न जवळजवळ ठप्प झाले होते. मात्र कोरोना रुग्णसंख्या कमी झाल्याने ७ जूनपासून जिल्ह्यात निर्बंध शिथिल करण्यात आले आहेत. एसटी वाहतूकही पूर्ण क्षमतेने सुरू करण्यात आली आहे. यामुळे प्रवाशांना दिलासा मिळाला आहे. मात्र लांब पल्ल्याच्या प्रवासासाठी नागरिक एस.टी. बसच्या तुलनेत ट्रॅव्हल्सलाच जास्त पसंती देत आहेत. एस.टी.पेक्षा ट्रॅव्हल्सचा प्रवास आरामदायक असल्याचा समज निर्माण होत आहे.
खासगी वाहनांच्या अपघातांत वाढ
अलीकडच्या काळात खासगी वाहनांच्या अपघातांत वाढ झाली आहे. बहुतांश अपघात खराब रस्त्यांमुळे होत असले, तरी याला वाहनधारकही तेवढेच जबाबदार आहेत; कारण रस्ता चांगला असल्यास वाहने सुसाट वेगाने पळविली जातात. यामुळे वाहनावर नियंत्रण मिळविणे कठीण होत असल्याने अनेक वेळा अपघाताच्या घटना घडत असल्याचे पाहायला मिळत आहे.
एस.टी.ला स्पीड लॉक, ट्रॅल्हल्स सुसाट
अपघात टाळण्यासाठी एस.टी. महामंडळाच्या बसना स्पीड लॉक करण्यात आले आहे. यामुळे इतर खासगी वाहनांच्या तुलनेत एस.टी. बसचे अपघात नसल्यासारखे आहेत. एस.टी.चा प्रवास खरोखरच सुरक्षित प्रवास आहे.
एस.टी. बसमध्ये अत्याधुनिक सुविधा उपलब्ध करून देण्यात येत आहेत. लांब पल्ल्यासाठी सोडण्यात येणाऱ्या बसमध्ये या सुविधा प्रामुख्याने देण्यात येतात. एस.टी. बसमध्ये आरक्षणाची व्यवस्थादेखील आहे. प्रवाशांनी या सुविधांचा लाभ घेऊन एसटी बसने प्रवास करावा.
-ए. यू. कच्छवे,
विभागीय वाहतूक नियंत्रण, बुलडाणा.
आराम महत्त्वाचा की सुरक्षित प्रवास ?
ट्रॅव्हल्सचा प्रवास आरामदायक असल्याने ट्रॅव्हल्सने प्रवास करण्याला जास्त पसंती मिळते. मात्र एस.टी.चा प्रवास तेवढा आरामदायक नसला तरी सुरक्षित नक्कीच आहे. त्यामुळे आम्ही नेहमी ट्रॅव्हल्सऐवजी एस.टी. बसने प्रवास करतो.
- राजेंद्र पाटील, प्रवासी.
ट्रॅव्हल्सचे तिकीट एस.टी. बसच्या तुलनेत जास्त असते. त्यामुळे ट्रॅव्हल्सचा प्रवास खूप खर्चिक आहे. एस.टी.चे तिकीट कमी असल्याने ते बजेटमध्ये आहे. यामुळे ग्रामीण भागातील प्रवासी एस.टी. बसलाच पसंती देतात.
- विजय रहाणे, प्रवासी.