अज्ञात वाहनाच्या धडकेत जवान ठार, भानापूरजवळचा प्रकार

विकास शालीग्राम गायकवाड असे जवानाचे नाव आहे.

संदीप वानखडे, सुलतानपूर (बुलढाणा): भरधाव अज्ञात वाहनाच्या धडकेत सीमा सुरक्षा दलाचा जवान जागीच ठार झाला तर एक जण गंभीर जखमी झाला. ही घटना लाेणार तालुक्यातील भानापूरजवळ १७ मे राेजी रात्री ९.३० वाजता घडली. विकास शालीग्राम गायकवाड रा. येसापूर असे मृतक जवानाचे नाव आहे. सीमा सुरक्षा दलात कार्यरत असलेले विकास गायकवाड व किशाेर शंकर धांडे हे दुचाकी क्र. एमएच २८-२४५७ ने सुलतापूर येथून येसापूर गावाकडे जात हाेते. दरम्यान, रात्री ९.३० च्या दरम्यान नागपूर औरंगाबाद राज्य महामार्गावर भानापूर जवळ त्यांच्या दुचाकीला अज्ञात वाहनाने जबर धडक दिली. यामध्ये विकास गायकवाड यांचा जागीच मृत्यू झाला तर किशाेर धांडे हे जखमी झाले.गायवाकड यांच्या पार्थीवावर १८ मे राेजी अंत्यसंस्कार करण्यात येणार आहे.