रस्ता दुरुस्तीसाठी होमहवन !

मलकापूर येथील रस्त्याची दुरवस्था प्रशासनाच्या नजरेत आणुन देण्यासाठी शिवसेनेने अभिनव असे होमहवन आंदोलन केले.

मलकापूर : शहरातील भारतकला रस्त्याची झालेली दयनीय अवस्था पाहता या रस्त्याचे काम त्वरित करण्यात यावे, यासाठी आज १५ मे रोजी शिवसैनिकांनी शहरप्रमुख किशोर नवले व तालुकाप्रमुख अरुण अग्रवाल यांनी रस्त्यावरच होमहवन करून गांधीगिरी पद्धतीने आंदोलन केले. तब्बल १ ते दीड तास चाललेल्या या पूजाअर्चा व होमहवनामुळे बघ्यांची गर्दी झाली होती. शहरातील भारतकला रोड हा मलकापूर शहरातील सर्वाधिक कर देणार्‍या नागरिकांचा रस्ता म्हणून ओळखल्या जातो; मात्र गेल्या अनेक वर्षांपासून या रस्त्याची अत्यंत दयनीय अवस्था झाली आहे. आताच पायी चालणे कठीण आहे, तर पुढे पावसाळ्याच्या दिवसात या रस्त्यावर ठिकठिकाणी पाण्याचे मोठे डबके साचतात. हा रस्ता तत्काळ सुधारावा यासाठी शिवसेनेच्या वतीने या अगोदर अनेकवेळा निवेदने, मोर्चे व वेगवेगळी आंदोलने करण्यात आली; मात्र नगर परिषद प्रशासनाने त्याची दखल घेतली नाही. त्यामुळे या रस्त्याच्या सुधारणेसाठी देवालाच प्रसन्न करावे, यासाठी आज १५ मे रोजी शिवसैनिक अचानकच हनुमान चौकात भररस्त्यात पूजाअर्चा करू लागले. दरम्यान, परिसरातील नागरिकांनी या ठिकाणी एकच गर्दी केली.