मतदानापासून वंचित ठेवल्याची तक्रार

सरपंच पदावरील अविश्‍वासावर घेण्यात निवडणुकीत ग्रा.पं.सदस्यांना मतदानापासून वंचीत ठेवल्याची तक्रार जिल्हाधिकारीकडे केली आहे.

मेहकर : तालुक्यातील पांगरखेड येथील सरपंच पदावरील अविश्‍वासावर घेण्यात निवडणुकीत ग्रा.पं.सदस्यांना मतदानापासून वंचीत ठेवल्याची तक्रार गजानन सवडतकर व नारायण सुर्वे यांनी जिल्हाधिकारी बुलडाणा यांच्याकडे निवेदनाद्वारे केली आहे.पांगरखेड सरपंच कुंदा गणेश इंगळे यांच्या विरुद्ध अविश्‍वास प्रस्ताव २ जून २0१४ रोजी तहसिलदार मेहकर यांच्याकडे दाखल करण्यात आला होता. त्यानुसार तहसिलदारांनी अविश्‍वास प्रस्तावावर चर्चा करण्याकरीता ७ जून रोजी ग्रा.पं.पांगरखेड येथे विशेष सभेचे आयोजन केले. सभेमध्ये गजानन तुकाराम सवडदकर व नारायण दिनकर सुर्वे यांना अप्पर जिल्हाधिकारी बुलडाणा यांनी ग्रा.पं.सदस्य पदावरुन अपात्र केल्याने त्यांना मतदान प्रक्रियेत भाग घेऊ देऊ नये, अशी लेखी हरकत सरपंच कुंदा इंगळे यांनी तहसिलदारांकडे दिली. त्यावरुन तहसिलदार यांनी गजानन सवडदकर व नारायण सुर्वे यांना विचारणा केली असता त्यांनी ग्रा.पं.सदस्य पदावर कायम असल्याचे सांगितले. यासंदर्भात अमरावती आयुक्तांनी ग्रा.पं.सदस्यपद कायम असल्याचा निर्णय दिलेला असून, ग्रा.पं.च्या प्रत्येक बैठकीत सुमारे दिड वर्षापासून उपस्थित राहत असल्याचेही तहसिलदार यांना गजानन सवडदकर व नारायण सुर्वे यांनी सांगितले. परंतु सरपंच व तहसिलदार यांनी यासंदर्भात कुठलीच दखल न घेता गजानन सवडदकर व नारायण सुर्वे यांना मतदानापासून वंचीत ठेवले. त्यामुळे सरपंच कुंदा इंगळे यांच्याविरुद्धचा अविश्‍वास ठराव पारित होऊ शकला नाही. याकडे वरिष्ठांनी लक्ष द्यावे, अशी मागणी गजानन सवडदकर व नारायण सुर्वे यांनी जिल्हाधिकार्‍यांकडे निवेदनाद्वारे केली आहे.