कार्यालयाबाहेर भरते दुसरे कार्यालय

अधिकारी बदलताच भीती संपली ; बुलडाण्याच्या आरटीओ कार्यालयात दलालांचा मुक्त वावर.

बुलडाणा : महेश झगडे या सनदी अधिकार्‍याने बुलडाण्यापासून मुंबईपर्यंतच्या तमाम आरटीओ कार्यालयांना गेली काही महिने प्रचंड शिस्त लावली होती. पैसे दिल्याशिवाय काम होत नाही म्हणणारी जनता कोणत्याही एजंटाची मदत न घेता नियमानुसार पैसे देऊन आपले काम करून आणत होते; मात्र शासनाने झगडे यांची बदली केली आणि आरटीओतील दहशतच संपली. पर्यायाने आरटीओ कार्यालयांमध्ये पुन्हा बेशिस्त सुरू झाल्याचे चित्र पाहायला मिळत आहे. आरटीओ कार्यालयात दलालांची मक्तेदारी वाढत असून, त्यांच्याकडून विविध कामे घेऊन येणार्‍या वाहनधारकांची आर्थिक लूट होत आहे. उपप्रादेशिक परिवहन कार्यालयातील सर्व महत्त्वाची कामे परिसरात दलालामार्फत होत असल्यामुळे कार्यालयाबाहेर दुसरे कार्यालय भरत असल्याचे चित्र येथे पाहायला मिळत आहे. उपप्रादेशिक परिवहन विभागात वाढता दलालांचा वावर लक्षात घेऊन परिवहन आयुक्तांनी आरटीओ कार्यालयात दलालांना प्रतिबंध घालण्याचा फतवाच काढला होता; मात्र या आदेशामुळे बेरोजगारांचे नुकसान होत असल्याचे कारण पुढे करून या आदेशाच्या विरोधात अकोला ट्रक ओनर्स असोसिएशनने मुंबई उच्च न्यायालयाच्या नागपूर खंडपीठामध्ये याचिका दाखल केली होती. मार्च २0१५ मध्ये उच्च न्यायालयाच्या नागपूर खंडपीठाने आदेश काढून दलालांवरील प्रतिबंध आदेशावर निकाल दिला. यानुसार अधिकृत दलालांनाच आरटीओ कार्यालयांमध्ये काम करू देण्यास मान्यता दिली. यानंतरही शहरातील आरटीओ कार्यालयात पुन्हा सर्वच दलाल सक्रिय झाले आहे. त्यामुळे परिवहन विभागापुढे दलालमुक्तीचे आवाहन पुन्हा उभे ठाकले आहे. वाहन परवाना, नवीन गाडीचे रजिस्ट्रेशन, रिक्षा टॅक्सीचे परमिट आदींसह अन्य कामे थेट आरटीओच्या कार्यालयात कर्मचार्‍यांच्या माध्यमातून काम करायचे झाले तर त्याला अनेक फाटे फुटतात. दोन दिवसांत होणार्‍या कामाला किती दिवस लागतील, हे कोणीही सांगू शकत नाही; मात्र दलालांच्या माध्यमातून एखादे काम करायचे झाल्यास हे ठरल्या वेळेवर होते. आरटीओ कार्यालयात दलालांची मक्तेदारी वाढली आहे. या दलालांनी काही कर्मचार्‍यांच्या मदतीने परिवहन कार्यालयाबाहेर झाडाखाली, मुख्य प्रवेशद्वाराजवळ, भिंतीच्या आडोशाला कोपर्‍यात आपले स्वतंत्र्य कार्यालयच थाटल्याचे नजरेस पडते. कामाला आलेल्या नागरिकांना कार्यालयाबाहेर हेरले जाते. कोणतेही काम तत्काळ करून देण्याचे आमिष देऊन नागरिकांची आर्थिक लूट सुरू आहे. आरटीओ कार्यालयात येणार्‍या नागरिकांची कामे त्वरित करा, त्यांना मार्गदर्शन करा, सूचनाचे माहिती फलक लावा, अशा सूचना देण्यात आल्या आहे. शिवाय परिवहन आयुक्तांच्या आदेशाची अंमलबजावणी कार्यालयात सुरू असून, एजंटांना कार्यालय परिसराबाहेर काम करण्याच्या सूचना आहे. शिवाय यासाठी जनतेकडूनही सहकार्य अपेक्षित आहे. या संदर्भात उपप्रादेशिक परिवहन अधिकारी संदेश चव्हाण यांच्याशी संपर्क साधला असता त्यांनी आरटीओ कार्यालयात येणार्‍या नागरिकांची कामे त्वरित करा, त्यांना मार्गदर्शन करा, सूचनाचे माहिती फलक लावा, अशा सूचना देण्यात आल्या असल्याचे सांगीतले. शिवाय परिवहन आयुक्तांच्या आदेशाची अंमलबजावणी कार्यालयात सुरू असून, एजंटांना कार्यालय परिसराबाहेर काम करण्याच्या सूचना आहे. शिवाय यासाठी जनतेकडूनही सहकार्य अपेक्षित असल्याचे मत त्यांनी व्यक्त केले.