संदीप वानखडे
बुलडाणा : एमपीएससीची राज्यसेवा पूर्व परीक्षा व रेल्वेची परीक्षा एकाच दिवशी येत असल्याने विद्यार्थ्यांसमाेर पेच निर्माण झाला आहे. वेगवेगळ्या परीक्षा केंद्रांंवर या परीक्षा हाेणार असल्याने विद्यार्थ्यांना दाेनपैकी एकच परीक्षा देता येणार आहे. दाेन्ही परीक्षा २१ मार्च राेजी राज्यभरातील विविध परीक्षा केंद्रांवर हाेणार आहेत.
गत काही महिन्यांपासून एमपीएससीच्या परीक्षांचा सावळागाेंधळ सुरू आहे. आतापर्यंत राज्यसेवा पूर्व परीक्षा वेगवेगळ्या कारणांमुळे पाचव्यांदा पुढे ढकलण्यात आली आहे. एमपीएससीने राज्येसवा पूर्व परीक्षा २१ मार्च राेजी घेण्याचा निर्णय घेतला आहे. या निर्णयाचा रेल्वेची परीक्षा देणाऱ्या विद्यार्थ्यांना फटका बसणार आहे. रेल्वेच्या वतीने विविध पदांसाठी देशभरात विविध केंद्रांवर पाच टप्प्यात परीक्षा घेण्यात येत आहेत. येत्या २१ मार्चलाही देशभरातील विविध केद्रांवर ही परीक्षा हाेणार आहे.
रेल्वेच्या परीक्षा पूर्वनियाेजित
रेल्वेच्या ३२ हजार २०८ जागांसाठी पाच टप्प्यात ऑनलाईन पद्धतीने परीक्षा घेण्यात येत आहेत. सध्या पाचव्या टप्प्यातील परीक्षा सुरू आहेत. देशभरातील १९ लाख विद्यार्थी ही परीक्षा देत आहेत. यामध्ये राज्यातील विद्यार्थ्यांचाही समावेश आहे. रेल्वेची पूर्व नियाेजित परीक्षा असतानाही एमपीएससीनेही त्याच तारखेला परीक्षा घेण्याची घाेषणा केली आहे. त्यामुळे राज्यातील हजाराे विद्यार्थी एका परीक्षेपासून वंचित राहणार आहेत.
लाॅकडाऊनचा विद्यार्थ्यांना बसणार फटका
काेराेना संसर्ग वाढत असल्याने राज्यातील अनेक जिल्ह्यांमध्ये लाॅकडाऊन करण्यात आले आहे. एमपीएससीने परीक्षा पुढे ढकलल्याने विद्यार्थ्यांना परीक्षा केंद्रावर पाेहचण्यासाठी कसरत करावी लागणार आहे. तसेच हाॅटेल बंद राहणार असल्याने घरच्या शिदाेरीवरच परीक्षा द्यावी लागणार आहे. लाॅकडाऊन असलेल्या शहरामध्ये राहण्याची साेय हाेणार नसल्याने परीक्षेला वेळेवर पाेहाेचण्यासाठी धडपड करावी लागणार आहे.
विद्यार्थ्यांना बसला भुर्दंड
लाॅकडाऊननंतर शहरांमध्ये अभ्यास करण्यासाठी गेलेले विद्यार्थी गावी परतले आहेत. या विद्यार्थ्यांनी १४ मार्चला हाेणाऱ्या परीक्षेला जाण्यासाठी रेल्वेचे आरक्षणही केले हाेते. मात्र, ऐनवेळेवर एमपीएससीने परीक्षा पुढे ढकलल्याने विद्यार्थ्यांना नाहकचा भुर्दंड बसला आहे. तसेच काही जिल्ह्यांमध्ये सुरू असलेल्या लाॅकडाऊनमुळे २१ मार्चला हाेणाऱ्या परीक्षेला केंद्रावर पाेहाेचण्यासाठी कसरत करावी लागणार आहे.