बुलडाणा : राज्यातील अनेक जिल्ह्यांत पुरामुळे गंभीर परिस्थिती निर्माण झाल्याचे चित्र आहे. अनेकांचे संसार उघड्यावर आले आहेत, अशा पूरग्रस्तांना मदत करण्यासाठी महाराष्ट्र अंधश्रद्धा निर्मूलन समितीने पुढाकार घेतला आहे. पूरग्रस्तांच्या मदतीसाठी 'साथी हात बढाना' असे आवाहन समितीकडून करण्यात आले असून, त्यासाठी राज्यभरातील सदस्य कामाला लागले आहेत.
राज्यातील अनेक जिल्ह्यात महापूरने थैमान घातले आहे. त्यामध्ये पश्चिम महाराष्ट्रातील सर्वाधिक नुकसान झाले आहे. अनेकांच्या घरात पाणी शिरल्याने त्यांचा संसार पाण्यात बुडाल्याचे गंभीर चित्र आहे. पुराचा फटका बसलेल्या कुटुंबांना मदतीची नितांत गरज आहे. पूरग्रस्तांना तातडीची मदत म्हणून प्रतिकुटुंब दहा हजार रुपये रोख व धान्य स्वरूपात पाच हजार रुपयांची मदत राज्याच्या सर्व पूर व आपत्तीग्रस्त भागात देण्याची घोषणा पुनर्वसनमंत्री विजय वडेट्टीवार यांनी केली आहे. परंतु या मदतीची प्रतीक्षा न करता महाराष्ट्र अंधश्रद्धा निर्मूलन समितीने राज्यभरातून मदत कार्य करण्यास सुरुवात केली आहे. या मदतीसाठी राज्यातील प्रत्येक जिल्ह्यातील समिती सदस्य सक्रिय झाले आहे. २५ जुलैपासून राज्यभरातून मदत कार्य सुरू झाले आहे.
अशी दिली जाते मदत
पूरग्रस्त कुटुंबाला प्रत्यक्ष भेटून मदत देण्यात येत आहे. यामध्ये जीवनावश्यक वस्तू, नवीन कपडे, चादरी, ब्लँकेट, शाली, शैक्षणिक साहित्य, फूड पॅकेट, पाणी बॉटल, औषधे या वस्तू प्राधान्याने देण्यात येत आहेत. मदतीसाठी चांगला प्रतिसादही मिळत आहे.
मदत संकलन केंद्र
पुरग्रस्त जिल्ह्यासाठी महाराष्ट्र अंधश्रद्धा निर्मूलन समिती मदत संकलन केंद्र पाच ठिकाणी आहे. त्यामध्ये रायगड, रत्नागिरी, कोल्हापूर, सांगली, सातारा जिल्ह्यात मदत संकलन केंद्र आहे.
आपली मदत थेट गरजूंपर्यंत
महाराष्ट्र अंनिसने राज्यभरातील कार्यकर्त्यांना पूरग्रस्तांच्या मदतीसाठी आवाहन केले आहे. त्यानुसार समिती सदस्य काम करत आहेत. गेल्या तीन दिवसात मदतीचा ओघ चांगला दिसून आला. आपली मदत थेट गरजू व्यक्तींपर्यंत पोहोचविण्यात आली आहे.
प्रशांत पोतदार, राज्य कार्य. सदस्य, सातारा
विदर्भातूनही मदतीचा ओघ हवा
महापूरलामुळे अनेकांचे संसार उघड्यावर आले आहे. या पूरग्रस्तांच्या मदतीसाठी महाराष्ट्र अंनिसचे सर्व सदस्य काम करत आहेत. विदर्भातूनही मदतीचा ओघ वाढावा, हीच अपेक्षा.
नरेंद्र लांजेवार, महाराष्ट्र अंधश्रद्धा निर्मूलन समिती